భూపాలపల్లి అర్బన్, వెలుగు: అక్రమంగా గంజాయిని రవాణా చేస్తున్న ఇద్దరు వ్యక్తులను అరెస్ట్ చేసి, 2 కేజీల గంజాయిని స్వాధీనం చేసుకున్న ఘటన గురువారం భూపాలపల్లి జిల్లా గణపురం పోలీస్స్టేషన్ పరిధిలో జరిగింది. జిల్లా కేంద్రంలో ఏర్పాటు చేసిన ప్రెస్మీట్లో డీఎస్పీ సంపత్రావు వివరాలు వెల్లడించారు. గంజాయి రవాణాపై సమాచారం రావడంతో డీఎస్పీ, చిట్యాల సీఐ మల్లేశ్ఆదేశాలమేరకు గణపురం ఎస్సై తన సిబ్బందితో కలిసి రవినగర్ వద్ద వాహన తనిఖీ నిర్వహించారు. ఈ క్రమంలో ఇద్దరు వ్యక్తులు అనుమానాస్పద స్థితిలో ఆటోలో వెళ్తుండగా, పట్టుకుని తనిఖీ చేయగా డ్రైవర్ సీటు కింద సుమారు 2 కేజీల గంజాయి కవర్ కనిపించింది.
దీంతో వారిని అదుపులోకి తీసుకుని విచారించగా, దాసరి రాములు(55), మిట్టపల్లి నిషాంత్(28) డబ్బుల కోసం కొద్ది రోజులుగా ఒరిస్సాలోని మల్కాన్గిరి జిల్లా కొండ పరివాహక ప్రాంతంలోని రమేశ్అనే వ్యక్తి వద్ద గంజాయిని కొనుగోలు చేసి భూపాలపల్లి, గణపురం మండలాల పరిధిలో విక్రయిస్తున్నట్లు ఒప్పుకున్నారు. ఈ మేరకు వారిపై కేసు నమోదు చేసుకుని, గంజాయిని స్వాధీనం చేసుకున్నట్లు డీఎస్పీ తెలిపారు.
