- అమెరికాలో ఇలాంటి తీర్మానం ఇదే మొదటిది
వాషింగ్టన్: అమెరికాలో హిందువులపై జరుగుతున్న దాడులను, హిందూ ఫోబియా(హిందువులంటే అనవసర భయం)ను ఖండిస్తూ జార్జియా స్టేట్ అసెంబ్లీ తీర్మానం చేసింది. యూఎస్లో హిందూ ఫోబియాను ఖండిస్తూ ఒక రాష్ట్ర అసెంబ్లీ తీర్మానం చేయడం ఇదే మొదటిసారి. ‘ప్రపంచంలోని అతిపెద్ద, పురాతన మతాల్లో హిందూ మతం ఒకటి. ప్రపంచవ్యాప్తంగా 100కు పైగా దేశాల్లో 120 కోట్లకుపైగా ప్రజలు ఆ మతాన్ని అనుసరిస్తున్నారు.
భిన్నమైన సంస్కృతులు, విశ్వాసాలు, పరమత సహనం, శాంతి సామరస్యాలతో వారు జీవనం సాగిస్తారు. అలాంటి మతంపై దాడులు సరికాదు” అని తీర్మానంలో అసెంబ్లీ పేర్కొంది. చట్టసభ ప్రతినిధులు లారెన్ మెక్ డొనాల్డ్, టాడ్ జోన్స్ ఈ తీర్మానాన్ని సభలో ప్రవేశపెట్టారు. హిందూమతాన్ని అనుసరించే కోట్లాది మంది ప్రజలు అన్ని మతాలను సమానంగా ఆదరిస్తారని, పరస్పరం గౌరవించుకుంటారని జార్జియా స్టేట్ అసెంబ్లీ వ్యాఖ్యానించింది.
శాంతికి ప్రాధాన్యత ఇస్తారని, విలువలకు కట్టుబడి ఉంటారని పేర్కొంది. అలాంటి హిందూమతాన్ని కించపర్చడం గానీ, ఆ మతాన్ని అనుసరించే వారిపై దాడులు చేయడం గానీ సరికాదని వ్యాఖ్యానించింది. అమెరికా అభివృద్ధికి అమెరికన్ హిందువుల సేవలు కూడా వెలకట్టలేనివని కొనియాడింది.
