మన దేశంలో ప్రతి ఐదొందల మందిలో ఒకరికి ఆటిజం లక్షణాలు ఉన్నాయి. అంటే మనదేశంలో దాదాపు మూడు మిలియన్ల మంది ఆటిజం స్పెక్ట్రమ్ డిజార్డర్తో బాధపడుతున్నారు. ఇవి కనిపించే లెక్కలు మాత్రమే. అయితే పిల్లల్లో దీన్ని ముందుగానే గుర్తిస్తే.. వాటికి సంబంధించిన సమస్యల్ని వాళ్లు ఈజీగా దాటగలుగుతారు. అందుకు కావాల్సింది పేరెంట్స్లో, సొసైటీలో ఆటిజంపై అవేర్నెస్. దానికోసం ఓ అడుగు వేశారు హైదరాబాద్లోని ‘విహార మెడికేర్’ హాస్పిటల్ డైరెక్టర్స్ అర్చనా డిడిగె, డాక్టర్ మనీష్ గౌర్. వరల్డ్ ఆటిజం అవేర్నెస్ మంత్ సందర్భంగా ఈ నెలంతా స్కూల్స్, కాలేజీల్లో ఆటిజంపై అవేర్నెస్ కల్పించారు వీళ్లు.
ఆటిజంని ఒక జబ్బుగా చూస్తుంటారు చాలామంది. కానీ, ఇదొక న్యూరలాజికల్ డిజార్డర్. జన్యుపరమైన కారణాలు, ఇమ్యూనిటీ లోపాలు..ఇలా మరెన్నో రీజన్స్ వల్ల వస్తుంది. అయితే పిల్లల్లో దీన్ని మొదటి స్టేజ్లోనే గుర్తించి ట్రీట్మెంట్ ఇప్పిస్తే... వాళ్లు ఆ సమస్య నుంచి తేలిగ్గా బయటపడగలుగుతారు. కానీ, పిల్లల్లో ఆటిజంని గుర్తించడంలో చాలామంది తల్లిదండ్రులు ఫెయిలవుతున్నారు. దాంతో పరిస్థితి చేయి దాటుతోంది. అందుకే ఆటిజంపై వీలైనంత ఎక్కువమందికి అవేర్నెస్ కల్పించాలి అనుకుంది విహార మెడికేర్ టీమ్. ఆ ప్రయత్నమే ఈ అవేర్నెస్ పాఠాలు.
ఆటిజం గుర్తించడం ఎలా?
సాధారణంగా మూడు నెలల వయసు నుంచే పిల్లలు తల్లిని గుర్తుపడతారు. ఆరు నెలల వచ్చేసరికి సైగల్ని అర్థం చేసుకుంటారు. ఏడాదికి వాళ్ల భాషలో కమ్యూనికేట్ చేసేందుకు ట్రై చేస్తుంటారు. మూడేండ్ల లోపే మాట్లాడటం కూడా మొదలుపెడతారు. కానీ, ఆటిజం ఉన్న పిల్లల్లో ఇవేం కనిపించవు. వాళ్ల చూపు, వినికిడి బాగానే ఉంటుంది. కానీ, సరిగా ఐ– కాంటాక్ట్ ఇవ్వలేకపోతారు. పేరు పెట్టి పిలిచినా రెస్పాండ్ అవ్వరు. సరిగా మాట్లాడలేరు. వాళ్ల ఎమోషన్స్ని, ఫీలింగ్స్ని కమ్యూనికేట్ చేయలేకపోతారు. కొందరిలో మూర్ఛ వ్యాధి కూడా ఉంటుంది. వీలైనంత త్వరగా పేరెంట్స్ తమ పిల్లలో ఈ లక్షణాల్ని గుర్తిస్తే ఆటిజం ట్రీట్మెంట్ చేయడం ఈజీ అవుతుంది. ఇదే విషయాన్ని ఈ నెలంతా జరిగిన అవేర్నెస్ క్యాంప్లలో సైకాలజిస్ట్ల సాయంతో అందరికీ అర్థమయ్యేలా చెప్పింది విహార హాస్పిటల్స్ టీమ్. వీటితో పాటు ఆటిజంతో బాధపడుతున్న చిన్నారులతో సొసైటీ ఎలా నడుచుకోవాలో కూడా అవగాహన కల్పించారు.
వాళ్లని అర్థం చేసుకోవాలి
వాస్తవానికి ఆటిజం పిల్లలు ఏ విషయమైనా త్వరగా నేర్చుకోగలుగుతారు. అయితే సరైన పద్ధతుల్లోనే నేర్పాలి. అలాగే పేరెంట్స్తో పాటు సొసైటీ కూడా ఈ పిల్లలకు స్కూల్స్, కాలేజీల్లో తగినంత స్పేస్ ఇవ్వాలి. వాళ్లని అర్థం చేసుకోవాలి. ఇదంతా జరగాలంటే అందరికీ ఆటిజం గురించి తెలియాలి. ‘‘అందుకే ఈ అవేర్నెస్ సెషన్స్ కండక్ట్ చేశాం. నెల రోజులపాటు జరిగిన ఈ అవేర్నెస్ క్యాంప్కి మంచి రెస్పాన్స్ వచ్చింది. ఫ్యూచర్లో ఇలాంటి కార్యక్రమాలు మరిన్ని చేయాలి అనుకుంటున్నాం’’ అంటోంది విహార మెడికేర్ టీమ్.
నాలుగు రకాలు
పిల్లలు సరిగా మాట్లాడలేకపోవడం, కమ్యూనికేషన్ లోపం, నలుగురిలో కలవలేక పోవడం లాంటి లక్షణాలన్నీ ఆటిజం స్పెక్ట్రమ్ డిజార్డర్ కిందకి వస్తాయి. ఇందులో నాలుగు రకాలున్నాయి.. వాటి గురించి కూడా అవేర్నెస్ కల్పించింది విహార మెడికేర్ హాస్పిటల్.
ఆస్పెర్గర్స్ సిండ్రోమ్ : ఆటిజం స్పెక్ట్రమ్లో ఆస్పెర్గర్స్ సిండ్రోమ్ ఒకటి. ఇది చాలా మైల్డ్ ఆటిజం. దీని బారిన పడ్డ పిల్లలు సాధారణ పిల్లల్లానే ఉంటారు. వాళ్లంతట వాళ్లే అన్ని పనులు చేసుకుంటారు. వీళ్లకి ఐక్యూ లెవల్స్ చాలా ఎక్కువ. ఫోకస్ కూడా బాగా ఉంటుంది. కానీ, నలుగురితో కలవరు.
పర్వేసివ్ డెవలప్మెంటల్ డిజార్డర్ : ఈ డిజార్డర్ బారిన పడినవాళ్లలో ఆటిజం లక్షణాలన్నీ ఉంటాయి. కానీ, అవన్నీ కాస్త ఆలస్యంగా బయటపడతాయి. అయితే ఆటిజం వాళ్లలో ఉండేంత పట్టుదల వీళ్లలో కనిపించదు.
ఆటిస్టిక్ డిజార్డర్ : ఆస్పెర్గర్స్, పర్వేసివ్ డెవలప్మెంట్ డిజార్డర్ సింప్టమ్స్ అన్నీ ఆటిస్టిక్ డిజార్డర్లో ఉంటాయి. అయితే ఆ లక్షణాల తీవ్రత ఎక్కువగా ఉంటుంది ఆటిస్టిక్ డిజార్డర్లో.
చైల్డ్హుడ్ డిస్ఇంటిగ్రేటివ్ డిజార్డర్ : ఆటిజం స్పెక్ట్రమ్లో చాలా రేర్ డిజార్డర్ ఇది. దీని బారిన పడ్డవాళ్లు నలుగురితో కలవరు. పదాలు పలకవు. బ్రెయిన్ డెవలప్మెంట్ సరిగా ఉండదు.
