గోదావరిఖని, వెలుగు : గోదావరిఖనిలో ఈ నెల 21 నుంచి 24 వరకు జరిగిన సమ్మక్క–సారలమ్మ జాతరలో ఏర్పాటు చేసిన 44 హుండీలను సోమవారం స్థానిక జీఎం ఆఫీస్ సమీపంలోని సారలమ్మ గుడి వద్ద లెక్కించారు. ఉదయం నుంచి రాత్రి వరకు లెక్కించగా హుండీలో రూ.29,44,489 నగదు వచ్చింది. అలాగే 23 అమెరికన్ డాలర్లు, కేజీ 800 గ్రాములు వెండి, 12 గ్రాముల బంగారం వచ్చింది.
అప్పటికే నిర్వహించిన జాతర టెండర్ల ద్వారా రూ.13,84,350, టిక్కెట్ల విక్రయం ద్వారా రూ.5,57,670 రాగా మొత్తం కలిపి రూ.48,86,509 ఆదాయం లభించింది. ఈసారి జాతరలో డిజిటల్ స్కానర్లను ఏర్పాటు చేయగా, దాని ద్వారా వచ్చిన నగదు తెలియాల్సి ఉంది. రాజరాజేశ్వరస్వామి మహిళా గ్రూపు సభ్యులు హుండీ డబ్బు లెక్కించగా, జాతర కమిటీ అధ్యక్షుడు శ్రీనివాసరెడ్డి, కార్యదర్శి బంగారి రాజయ్య, కార్పొరేటర్ జనగామ కవిత, ఎండోమెంట్అసిస్టెంట్ కమిషనర్ ఎ.చంద్రశేఖర్, ఈవో కాంతారెడ్డి, ఎస్ఐ ఫరీద్, కమిటీ సభ్యులు పాల్గొన్నారు.
నల్లగొండ జాతర ఆదాయం రూ.10లక్షలు
కొడిమ్యాల, వెలుగు: కొడిమ్యాల మండలంలోని నల్లగొండ శ్రీ లక్ష్మీనరసింహ స్వామి హుండీలను అధికారులు సోమవారం లెక్కించారు. నెల రోజులకు గానూ రూ.10,10,090 నగదు వచ్చినట్లు ఈవో అనూష తెలిపారు. లెక్కింపులో స్పెషల్ ఆఫీసర్ రవి కిషన్ ఆలయ సిబ్బంది పాల్గొన్నారు.
