పెద్ద పెద్ద మీసాలతో గుర్రున గాండ్రిస్తున్న ఈ పులి మొహం చూడండి.. తేడా కనిపించిందా!? పచ్చగా మెరిసిపోతూ బంగారు కోర పన్ను కంట పడిందా!? అదే ఈ బెంగాల్ టైగర్ స్పెషాలిటీ. మన పన్ను పాడైపోతే ఏం చేస్తం? పీకేసి కొత్త పన్ను కట్టించుకుంటం! ఖర్చు కొంచెం ఎక్కువైనా ఫర్వాలేదు కొంచెం గ్రాండ్గా కనిపించాలనుకుంటే ఆ పెట్టిన పంటిని బంగారంతో చేయించుకుంటం! జర్మనీలోని ఓ జూలో ఉంటున్న కేరా అనే ఈ బెంగాల్ టైగర్కూ అధికారులు ఇలా గ్రాండ్ లుక్ ఇచ్చారు. ఈ మధ్య ఆడుతూ ఆడుతూ ఓ కొయ్య బొమ్మను కొరికేసిందట కేరా. దీంతో దాని కుడి కోర పన్ను విరిగిపోయిందట. అందుకే జూ అధికారులు జూ యానిమల్ షెల్టర్లోని డెంటిస్ట్ దగ్గరకు ట్రీట్మెంట్ కోసం తీసుకెళ్లారు.
రెండు సిట్టింగ్ల ట్రీట్మెంట్ చేశారు. ఆగస్టులో చేసిన మొదటి సిట్టింగ్లో విరిగిన పన్నును షేప్ చేయడానికే రెండున్నర గంటలు పట్టిందట. అక్టోబర్ మొదటి వారంలో రెండో సిట్టింగ్లో అరగంటలో దానికి ఆ బంగారు పన్నును పెట్టారట. ప్రత్యేకమైన గమ్, అతినీలలోహిత కిరణాలతో అది చిగుళ్లకు అతుక్కునేలా ఫిక్స్ చేశారట. నిజానికి 2013లో ఇటలీలోని ముగ్నానోలోని ఓ ప్రైవట్ ఫార్మ్ హౌస్లో కేరా ఉండేదట. 2015లో అధికారులు కేరాను స్వాధీనం చేసుకుని జర్మనీలోని మాస్వైలర్లోని టియరర్ట్ టైగర్ స్టేషన్కు తరలించారు. ఇప్పుడు అది అక్కడే ఉంటోంది.