- బోర్లా పడుకుంటే 6 శాతం నుంచి 8 శాతం వరకు ఎక్కువ అవుతుందంటున్న నిపుణులు
- లంగ్స్ లోకి వైరస్ వ్యాప్తి వేగంగా జరగదని వెల్లడి
- ఒకసారి వచ్చిపోతే 6 నెలల దాకా మళ్లీ వైరస్ సోకదని కామెంట్
- కరోనా నుంచి కోలుకున్న 3 నెలల తర్వాత టీకా తీసుకోవాలని సూచన
న్యూఢిల్లీ: కరోనా సెకండ్వేవ్ మొదలైనప్పటి నుంచి ఎందరిలోనో ఏవేవో అనుమానాలు మెదులుతున్నాయి. కరోనా సోకి తగ్గినోళ్లు వ్యాక్సిన్ వేసుకోవచ్చా? ఆక్సిజన్ కాన్సంట్రేటర్లతో లాభమెంత? యువతకే ఎందుకు సీరియస్ అవుతోంది? వంటి ప్రశ్నలు గిర్రున తిరుగుతున్నాయి. వాటన్నింటికీ కొందరు ప్రముఖ డాక్టర్లు సమాధానాలు చెప్పారు. ఇండియా టుడే నిర్వహిస్తున్న డాక్టర్స్ రౌండ్ టేబుల్లో వాటికి వివరణాత్మకంగా సమాధానం చెప్పారు. ఇవీ వారి సూచనలు..
- లంగ్స్కు కరోనా వైరస్ వేగంగా వెళ్లట్లేదు. లంగ్స్లోకి వైరస్ పోవడానికి కొవిడ్ న్యుమోనియానే కారణం కాదు. వైరస్ సోకినప్పుడు ఒక్కోసారి ఇమ్యూన్ సిస్టమ్ అతిగా స్పందిస్తుంది. వైరస్ను చంపడానికి పుట్టిన యాంటీబాడీలే.. లంగ్స్నూ క్రాస్ యాక్టివిటీలో దెబ్బతీస్తున్నాయి. వైరస్ సోకిన 8వ రోజు నుంచి 14వ రోజు మధ్య ఇలాంటి పరిస్థితులు ఏర్పడుతున్నాయి. ఇలాంటి టైంలోనే స్టెరాయిడ్లు కీలకంగా మారుతున్నాయి.
- ఆక్సిజన్ లెవెల్స్ పడిపోయినట్టు అనిపిస్తే వెంటనే ప్రోనింగ్ (బోర్లా పడుకోవడం) చేయాలి. దాని వల్ల ఆక్సిజన్ లెవెల్స్ 6 నుంచి 8 శాతం దాకా పెరుగుతాయి. కాన్సంట్రేటర్ల వల్ల లాభం ఉన్నా వాటి ద్వారా 5 లీటర్ల కన్నా ఎక్కువ ఆక్సిజన్ను వాడుకోలేం. ఒకవేళ ఎక్కువ అవసరం అయితే మాత్రం ఆక్సిజన్ సిలిండర్లను వాడాల్సిందే.
- 50 ఏళ్లు దాటిన వారిలో పల్స్రేట్ 140 కన్నా ఎక్కువుంటే డేంజర్.
- సీటీస్కాన్ ఎప్పుడు పడితే అప్పుడు చేయొద్దు. ఆక్సిజన్ 94 కన్నా పడిపోయినప్పుడు, ఇన్ఫెక్షన్ మార్కర్లు ఎక్కువైనప్పుడు, పేషెంట్ పరిస్థితి సీరియస్గా ఉన్నప్పుడు మాత్రమే సీటీస్కాన్ చేయాలి. ఆర్టీపీసీఆర్లో పాజిటివ్ వస్తే సీటీస్కాన్ అవసరం లేదు. వైరస్ సోకిన 5 నుంచి 7 రోజుల మధ్య సీటీ చేయాలి.
- గాలి ద్వారా కూడా వైరస్ సోకుతోంది. కాబట్టి వ్యాక్సినేషన్ను వేగంగా చేపట్టాలి. లేట్ అయ్యే కొద్దీ వ్యాక్సిన్లకూ లొంగకుండా వైరస్ మొండిగా మారే ప్రమాదం ఉంది.
- పారాసిటమాల్, మల్టీ విటమిన్లు, జింక్ తప్ప మొదటి వారంలో ఎలాంటి మందులూ వాడనక్కర్లేదు. జ్వరం ఉన్నాలేకున్నా ప్రతి 6 గంటలకు ఒకసారి పారాసిటమాల్ టాబ్లెట్ వేస్కోవాలి.
- రెండో వారంలో పరిస్థితి విషమిస్తే మాత్రం డాక్టర్ల సలహా మేరకు స్టెరాయిడ్లతో ట్రీట్మెంట్ తీసుకోవాలి. లంగ్స్ ఇన్ఫెక్షన్స్పై స్టెరాయిడ్స్ ట్రీట్మెంట్ బాగా పనిచేస్తుంది.
- డబ్ల్యూహెచ్వో చెప్పినట్టు ఇప్పుడు ఎవరికీ ప్లాస్మా ట్రీట్మెంట్ అవసరం లేదు.
- కరోనా వచ్చి తగ్గిపోయినోళ్లకు మళ్లీ 3 నుంచి 6 నెలల దాకా వైరస్ సోకదు.
- కరోనా తగ్గిన 3 నెలల తర్వాతే టీకా వేస్కోవాలి.
- వైరస్ సోకిన కొన్ని రోజులపాటు యువతలో ఇమ్యూనిటీ ఉంటోంది. అయితే, సడన్గా ఒకేసారి కొలాప్స్ అవుతోంది. ఇన్ఫెక్షన్ పెరగడంతో పరిస్థితి సీరియస్ అవుతోంది. కాబట్టి యువత కూడా ముందే జాగ్రత్త పడాలి.