- అకస్మాత్తుగా ఉద్యోగాలు కోల్పోయినవారూ ‘బీ’ వీసాలతో ఉండే అవకాశం
- ట్విట్టర్ ద్వారా వెల్లడించిన ఇమిగ్రేషన్ శాఖ
వాషింగ్టన్: జాబ్ సెర్చ్కోసం అమెరికాకు వెళ్లాలనుకునే వారికి శుభవార్త. బిజినెస్వీసా (బీ–1), టూరిస్టు వీసా (బీ–2) పై అమెరికాకు వెళ్లేవారు ఇకపై ఉద్యోగాలకు అప్లై చేసుకోవడంతో పాటు ఇంటర్వ్యూలకూ అటెండ్ కావచ్చు. అయితే, ఉద్యోగం వచ్చాక అందులో చేరాలంటే మాత్రం తప్పనిసరిగా వీసాను మార్చుకోవాల్సి ఉంటుంది. ఈ విషయాన్ని అమెరికా సిటిజెన్షిప్ అండ్ ఇమిగ్రేషన్సర్వీసెస్ విభాగం ట్విట్టర్ వేదికగా వెల్లడించింది.
జాబ్స్ కోల్పోయిన ఇతరదేశాల వారు 60 రోజుల గ్రేస్ పీరియడ్లోగా అమెరికా నుంచి వెళ్లిపోవాల్సి ఉంటుందనే ఆందోళనలో ఉన్నారని.. ఇకపై బీ1, బీ2 వీసాల ద్వారా ఇక్కడే ఉంటూ కొత్త జాబ్స్కు ట్రై చేసుకోవచ్చని తెలిపింది. జాబ్స్ కోల్పోయిన సందర్భాల్లో వీసాను ‘బీ గ్రేడ్’ (బీ1 లేదా బీ2)కు అప్డేట్ చేసుకొని ఈ వెసులుబాటును ఉపయోగించుకోవచ్చని సూచించింది. ఆర్థిక సంక్షోభ భయాలతో గూగుల్, మైక్రోసాఫ్ట్, అమెజాన్ వంటి ప్రముఖ కంపెనీలు భారత్సహా వివిధ దేశాలకు చెందిన ఉద్యోగులను పెద్దసంఖ్యలో తొలగించాయి. వారంతా 60 రోజుల గ్రేస్ పీరియడ్లోగా కొత్త జాబ్స్ను వెతుక్కునే ప్రయత్నాల్లో ఉన్నారు. ఇలాంటి వారందరికీ ఊరట కలిగించేందుకే అమెరికా ప్రభుత్వం ఈ నిర్ణయాన్ని తీసుకుంది.
దీనిపై ట్విట్టర్ వేదికగా పలువురు నెటిజన్స్ అడిగిన డౌట్స్ను అమెరికా ఇమిగ్రేషన్ విభాగం క్లియర్ చేసింది. సాధారణంగా అమెరికాలో పనిచేసే విదేశీ టెక్ నిపుణులకు హెచ్–1బీ వీసాలు ఇస్తారు. వీరు జాబ్స్ కోల్పోయినప్పుడు 60 రోజుల గ్రేస్ పీరియడ్లోగా కొత్త జాబ్ వెతుక్కోవాలనే నిబంధన ఉంది. ఈ గడువును ఒక సంవత్సర కాలానికి పొడిగించాలంటూ ఇటీవల రెండు ఇండియన్ అమెరికన్ సంస్థలు ప్రెసిడెంట్బైడెన్కు విజ్ఞప్తి చేశాయి. ఈ నేపథ్యంలోనే టెక్ నిపుణులకు అండగా నిలిచేందుకు ఈ నిర్ణయం తీసుకొని ఉండొచ్చని భావిస్తున్నారు.
