అహ్మదాబాద్: గుజరాత్లోని మోర్బిలో కేబుల్ బ్రడ్జి కూలిన దుర్ఘటనపై ఆ రాష్ట్ర హైకోర్టు సుమోటోగా విచారణ చేపట్టింది. ప్రస్తుత స్థితిపై నవంబర్ 14లోపు నివేదిక అందజేయాలని సోమవారం రాష్ట్ర ప్రభుత్వంతో పాటు స్థానిక అధికారులకు నోటీసులు జారీ చేసింది. మోర్బిలోని మచ్చు నదిపై ఉన్న తీగల వంతెన అక్టోబర్ 30న కూలిపోయి 135 మంది మృతిచెందారు.
ఈ ఘటనపై వార్తా పత్రికలలో వచ్చిన కథనాల ఆధారంగా చీఫ్ జస్టిస్ అరవింద్ కుమార్, జస్టిస్ అశుతోశ్ శాస్ర్తీలతో కూడిన బెంచ్ సుమోటోగా విచారణకు స్వీకరించింది. ఈ మేరకు సోమవారం రాష్ట్ర ప్రభుత్వ ప్రధాన కార్యదర్శి, రాష్ట్ర హోం శాఖ, మోర్బి మున్సిపల్ కమిషనర్, కలెక్టర్కు నోటీసులు జారీ చేసింది. నవంబర్ 14న విచారిస్తామని పేర్కొన్నది. పూర్తి నివేదిక అందించాలని రాష్ట్ర మానవ హక్కుల కమిషన్ ను కూడా ఆదేశించింది. ఈ కేసులో ఇప్పటికే 9 మందిని పోలీసులు అరెస్ట్ చేశారు.
