భద్రాద్రికొత్తగూడెం, వెలుగు : అసెంబ్లీ ఎన్నికల్లో బీఆర్ఎస్ తరుపున పోటీ చేస్తున్న అభ్యర్థుల్లో సగం మంది ఫోర్ ట్వంటీలేనని కాంగ్రెస్ నేత, కేంద్ర మాజీ మంత్రి రేణుకా చౌదరి ఆరోపించారు. కొత్తగూడెంలో కాంగ్రెస్ ఆధ్వర్యంలో బుధవారం ర్యాలీ నిర్వహించారు. తర్వాత కొత్తగూడెం క్లబ్లో నిర్వహించిన ప్రజా చైతన్య సభలో ఆమె మాట్లాడారు. ఉమ్మడి ఖమ్మం జిల్లాలో కాంగ్రెస్ కొత్తగూడెం నుంచే రణభేరి మోగించిందన్నారు. మాయ మాటలతో మోసం చేస్తున్న సీఎం కేసీఆర్కు ప్రజలు బుద్ది చెప్పేందుకు సిద్ధంగా ఉన్నారన్నారు.
ఉమ్మడి ఖమ్మం జిల్లాపై కేసీఆర్ప్రత్యేక నిఘా పెట్టారని విమర్శించారు. రాష్ట్రంతో పాటు కేంద్రంలో రాబోయేది కాంగ్రెస్ ప్రభుత్వాలేనన్నారు. కొత్తగూడెంలో ఒంటరిగా ఆడమనిషి తన సమస్యలను చెప్పుకునేందుకు ఎమ్మెల్యే ఇంటికి వెళ్లలేని దుస్థితి ఏర్పడిందన్నారు. పాల్వంచలో రామకృష్ణ కుటుంబం ఆత్మహత్య కేసులో ఎమ్మెల్యే కొడుకు ఉన్నారన్నారు. రాఘవ ఒక ఫోర్ ట్వంటీ అని ఆరోపించారు. అన్నం పెట్టిన తల్లి లాంటి కాంగ్రెస్ను మోసం చేసిన ఘనత ఎమ్మెల్యే వనమాకే దక్కుతుందన్నారు. కొత్తగూడెం టికెట్ను బీసీలకే ఇవ్వాలని మాజీ ఎమ్మెల్యే తాటి వెంకటేశ్వర్లు కోరారు. ఈ ప్రోగ్రాంలో టీపీసీసీ జనరల్సెక్రెటరీ ఎడవల్లి కృష్ణ, ఓబీసీ జాతీయ కో ఆర్డినేటర్ కత్తి వెంకటస్వామి, నాయకులు మల్లికార్జున్, అంథోటిపాల్, లక్కినేని సురేందర్, దళ్సింగ్, డాక్టర్ శంకర్ నాయక్, పగడాల మంజుల పాల్గొన్నారు.
