బర్త్ డేలకి, పెండ్లిండ్లకి.. మరికొన్ని స్పెషల్ అకేషన్స్కి మనలో చాలామంది ఫొటోషూట్లు చేయించుకుంటారు. కానీ, ఎప్పుడైనా.. ఎక్కడైనా ఒక ఎలుక ఫొటోలకి పోజులివ్వడం చూశారా! అయితే ఈ ఫొటోలోని ఎలుక గురించి కచ్చితంగా తెలుసుకోవాల్సిందే. బ్యూటెంగెబిడెన్ అనే ట్విట్టర్ యూజర్ ఈ చిట్టెలుక వీడియోని షేర్ చేశాడు. ఇరవై రెండు సెకన్లు ఉన్న ఈ వీడియోలో..ఫేమస్ వైల్డ్లైఫ్ ఫొటోగ్రాఫర్ జూలియన్ ర్యాడ్ కెమెరాతో ఫొటోలు తీస్తుంటాడు. ఆ శబ్దం విని కలుగులో దాక్కున్న చిట్టెలుక బయటికి వస్తుంది. అది గమనించిన జూలియన్.. దానికి ఒక పువ్వు ఇస్తాడు. వెంటనే దాన్ని అందుకుని ఫొటోలకి పోజులిచ్చింది. ఆ పువ్వుని తింటూ.. అది ఇచ్చిన పోజులు సోషల్ మీడియాలో వైరల్ అవుతున్నాయి. ఈ వీడియోని ఇప్పటికే యాభై లక్షల మందికి పైగా చూశారు. లక్షల్లో లైకులు వచ్చాయి. ఈ ఫొటో షూట్ చేసిన జూలియన్ని తెగ మెచ్చుకుంటున్నారు.
