ఇక్కడ గెలిచినోళ్లే ప్రెసిడెంట్ అవుతారని సెంటిమెంట్
ఫ్లోరిడాలో మళ్లీ గెలిచిన ట్రంప్
ఫ్లోరిడా: అమెరికా అధ్యక్ష పీఠాన్ని ఖరారు చేసే కీలక స్వింగ్ రాష్ట్రాల్లో ఒకటైన ఫ్లోరిడాలో ఈసారి కూడా డొనాల్డ్ ట్రంప్ విజయం సాధించారు. ఇక్కడి 29 ఎలక్టోరల్ కాలేజ్ ఓట్లను ఆయన దక్కించుకున్నారు. 21.5 మిలియన్ జనాభా ఉన్న ఫ్లోరిడా రాష్ట్రంలో 54 % మంది తెల్లజాతీయులు, 26% మంది హిస్పానిక్ జాతీయులు, 16% అఫ్రికన్ అమెరికన్స్, 3% ఏసియన్ అమెరికన్స్ ఉంటారు. ఈ రాష్ట్రంలో గెలిచిన వారు ప్రెసిడెంట్ అవుతారన్న సెంటిమెంట్ ఉంది. ఇక్కడ డెమొక్రాట్ పార్టీ అధ్యక్ష అభ్యర్థి జో బిడెన్ గెలుస్తారని మొదట్లో ప్రీ పోల్స్, మీడియా అంచనా వేసింది. ఈ కీలక రాష్ట్రంలో చివరి నిమిషంలో ట్రంప్ హోరాహోరీగా ప్రచారం నిర్వహించారు. తుది ఫలితాలు ఆయనకే అనుకూలంగా వచ్చాయి. 2016లో జరిగిన ఎన్నికల్లోనూ డెమొక్రాట్ అధ్యక్ష అభ్యర్థి హిల్లరీ క్లింటన్ ఫ్లోరిడాలో విజయం సాధిస్తారని సర్వేల్లో తేలినా.. చివరికి ట్రంప్ గెలిచారు.
2004 నుంచి ఫలితాలు ఇలా
ఇయర్ విజేత పార్టీ
2004 బుష్ రిపబ్లికన్
2008 ఒబామా డెమొక్రాట్
2012 ఒబామా డెమొక్రాట్
2016 ట్రంప్ రిపబ్లికన్
2020 ట్రంప్ రిపబ్లికన్