పొలంలో మొక్కలు పెంచడం ఎంత కష్టమో ఇంట్లో పెంచడం అంతకంటే కష్టం. ఎందుకంటే.. ఇంట్లో సరైన సూర్యరశ్మి, సరిపడా నీళ్లు అందుతున్నాయా? లేదా? అనేది ఎప్పటికప్పుడు చూస్తుండాలి. మొక్కల కోసం ప్రత్యేకంగా కేర్ తీసుకోవాలి. అయితే.. గార్డెనింగ్ కోసం తీసుకొచ్చిన కొన్ని గాడ్జెట్స్ వాడితే కాస్త పని తగ్గించుకోవచ్చు.అలాంటి గాడ్జెట్స్ కొన్ని..
మల్టీఫంక్షనల్ సాయిల్ టెస్టర్
గార్డెన్లో మొక్కలు బాగుండాలి. మట్టి బాగుండాలి. అందులో సరిపడా తేమ ఉండాలి. అది తెలుసుకోవడం ఎలా? అందుకే ఈ మల్టీ ఫంక్షనల్ సాయిల్ టెస్టర్ని సూపరెమో కంపెనీ మార్కెట్లోకి తెచ్చింది. ఇది నేలలోని తేమ, పీహెచ్, టెంపరేచర్తోపాటు సూర్యరశ్మిని కూడా కొలుస్తుంది. దీనికి చీకటిలో కూడా కనిపించే డిజిటల్ ఎల్సీడీ డిస్ప్లే ఉంటుంది. టెస్టర్కు ఉండే ప్రోబ్ని భూమిలో నాటగానే డిస్ప్లేపై వివరాలు చూపిస్తుంది. ఇందులో 9V బ్యాటరీ వేయాలి. ఇండోర్, అవుట్‌‌డోర్ ఎక్కడైనా పనిచేస్తుంది. కుండీల్లో పెట్టిన మొక్కలకే కాదు.. పొలాల్లో కూడా దీన్ని వాడొచ్చు.
ధర: 888 రూపాయలు
పెట్ రెపెల్లెంట్ స్ర్పింక్లర్
గార్డెన్లో స్ర్పింక్లర్ ఆన్ చేసి వేరే పనిలో పడతారు చాలామంది. కానీ... ఆ టైంలో పెంపుడు జంతువులు ఆ స్ర్పింక్లర్ వైపు వెళ్తే ప్రమాదం. పెట్స్ మాత్రమే కాదు.. గార్డెన్లో అటూఇటూ తిరిగే ఉడుతలు, పక్షులు, ఎలుకలు అటువైపు వెళ్లినా తడిసి ముద్దవుతాయి. అందుకే ఇంటి గార్డెన్లో వాడేందుకు ప్రత్యేకంగా తయారుచేసిన పెట్ రెపెల్లెంట్ స్ర్పింక్లర్ని బిగించుకోవాలి. బ్లాక్ ప్లస్ డెకోర్ కంపెనీ తీసుకొచ్చిన ఈ జెట్ స్ప్రేయర్ వాటర్ ప్రెజర్ దగ్గరకు జంతువులు రాగానే ఆటోమెటిక్గా ఆగిపోతుంది. జింకలు, కుందేళ్ళు, ఉడుతలు, ఉడుములు, పక్షులు, ఎలుగుబంట్లు, పిల్లులు, కుక్కలు, ఎలుకలు ఇలా అన్నింటినీ ఇది గుర్తిస్తుంది. పైగా స్ప్రింక్లర్ సౌండ్ చేస్తూ... వాటర్ని షూట్ చేస్తుంది. కాబట్టి జంతువులు అటువైపు వెళ్లవు. ఇందులో 30-అడుగుల వరకు పనిచేసే మోషన్ డిటెక్షన్- సెన్సర్ ఉంది. ధర: 9,675 రూపాయలు
పాలినేటర్
కొన్నాళ్ల నుంచి తేనెటీగలు, కీటకాల సంఖ్య బాగా తగ్గిపోతోందని రీసెర్చ్ల్లో వెల్లడైంది. పైగా మొక్కలపై పెస్టిసైడ్స్ ఎక్కువగా స్ర్పే చేయడం వల్ల మొక్కల్లో పాలినేషన్ బాగా తగ్గిపోతోంది. అందుకే పాలినేషన్ కోసం ప్రత్యేకంగా ఒక డివైజ్ వచ్చింది. దీన్ని ఏరో గార్డెన్ అనే కంపెనీ తయారుచేసింది. టొమాటో, దోసకాయ, పుచ్చకాయ... ఇలా ప్రతి మొక్కకు దీనితో పాలినేషన్ చేయొచ్చు. ముఖ్యంగా ఇంటి గార్డెన్లో పండే పంటలకు ఇది బెస్ట్‌ గాడ్జెట్. ఎందుకంటే.. సిటీల్లో ఇండ్లలోకి తేనెటీగలు లాంటివి రావడం చాలా కష్టం. కిడ్స్ ఎలక్ట్రిక్ టూత్ బ్రష్ సైజులో ఉండే ఈ పాలినేటర్ చాలా ఉపయోగపడుతుంది. ధర: 3,477 రూపాయలు
స్మార్ట్ ఇరిగేషన్ సిస్టమ్‌
కొన్ని రోజుల పాటు ఇంటికి దూరంగా ఉండాల్సి వచ్చినప్పుడు అందరూ ఆలోచించేది గార్డెన్లో మొక్కల గురించే. పెట్స్ అయితే.. కేర్ సెంటర్లలో వదిలి వెళ్లొచ్చు. కానీ.. మొక్కల్ని మనమే చూసుకోవాలి. అందుకే ఆలాంటి టైంలో మొక్కల బాగోగులు చూసేందుకు పినోలెక్స్ అనే కంపెనీ వైర్‌‌లెస్ స్మార్ట్ వాటర్ టైమర్ వైఫై హబ్‌‌ని మార్కెట్లోకి తెచ్చింది. ఈ హబ్‌‌ని వైఫైతో కనెక్ట్ చేయాలి. తర్వాత హబ్కి వాటర్, స్ర్పింక్లర్ పైపులను కనెక్ట్ చేయాలి. ఈ డివైజ్కు సంబంధించిన యాప్ని యూజర్ మాన్యువల్‌‌లో ఉండే క్యూఆర్ కోడ్‌‌ను స్కాన్ చేసి ఇన్స్టాల్ చేసుకోవాలి. ఆ యాప్ సాయంతో డివైజ్ని మొబైల్తో కనెక్ట్ చేసుకోవాలి. తర్వాత మొబైల్ నుంచే మొక్కల ఇరిగేషన్ని కంట్రోల్ చేయొచ్చు. అంతేకాదు.. అలారం సెట్ చేసినట్టు మొక్కకు నీళ్లు ఎప్పుడు పెట్టాలి అనేది కూడా సెట్ చేసుకోవచ్చు. పైగా ఇందులో స్ప్రింక్లర్, స్ప్రేయర్ రెండు మోడ్స్ ఉంటాయి. సీజన్‌‌ని బట్టి ఎలా కావాలంటే అలా మార్చుకోవచ్చు. ఎనిమిది ప్రత్యేక స్ప్రింక్లర్ ప్రోగ్రామ్‌‌లను కాన్ఫిగర్ చేయొచ్చు. ధర: 4,999 రూపాయలు
