మొదటి రోజు చూడాల్సిందే!

• ఐశ్వర్య మెనన్

టాలీవుడ్​కి పరిచయమైన మరో కొత్త నటి. చిన్నప్పటి నుంచి నటనంటే ఇష్టం ఉన్న ఈ అమ్మాయి టీవీ సీరియల్​తో తెరంగేట్రం చేసింది. అయితే, అందులో నటిస్తుండగానే సినిమాల్లో అవకాశాలు అందిపుచ్చుకుంది. మొదట్లో సపోర్టింగ్​ రోల్స్​లో మెప్పించిన ఈమె తక్కువ టైంలోనే లీడ్​ రోల్​లో నటించి ప్రేక్షకుల మనసు దోచేసింది. తమిళ, మలయాళ, కన్నడ భాషల్లో నటించిన ఐశ్వర్య లేటెస్ట్​గా ‘స్పై’ సినిమాతో టాలీవుడ్​ని పలకరించింది. ఐశ్వర్య మెనన్ ఫ్యామిలీ కేరళలోని చంద్రమంగళం అనే చిన్న ఊరికి చెందిన వాళ్లు. కానీ, ఐశ్వర్య పుట్టి పెరిగిందంతా తమిళనాడులోని ఈరోడ్​లో​. హయ్యర్ సెకండరీ ఎడ్యుకేషన్​ని వెల్లలార్ మెట్రిక్యులేషన్ స్కూల్లో చదివింది. తర్వాత ఎస్​.ఆర్​.ఎం యూనివర్సిటీలో ఇంజినీరింగ్​ చేసింది. ఇంజినీరింగ్​ చదివిన ఐశ్వర్య సినిమాల్లోకి ఎలా వచ్చింది? ఆ విషయాలన్నీ ఆమె మాటల్లోనే...

మొదట్నించీ ఇంట్రెస్ట్​

‘‘మా అమ్మ పేరు జయ ముకేశ్ మెనన్. మేకప్ ఆర్టిస్ట్​గా పనిచేసేది. నాన్న వరద రాజన్ మార్కెటింగ్​ ఫీల్డ్​లో పనిచేస్తారు. నాకు ఒక అన్నయ్య ఉన్నాడు. తన పేరు అభిషేక్ మెనన్. చిన్నప్పటి నుంచి నాకు యాక్టింగ్​ అంటే చాలా ఇష్టం ఉండేది. అందుకే స్కూల్లో డ్రామా కాంపిటీషన్స్​లో పాల్గొనేదాన్ని. ఆ ఇంట్రెస్ట్​తో కాలేజీ కల్చరల్​ ప్రోగ్రామ్స్​లో కూడా పార్టిసిపేట్​ చేసేదాన్ని. నా ఇంట్రెస్ట్​ చూసి మొదట్లో మా పేరెంట్స్ కూడా ఎంకరేజ్ చేసేవారు. కానీ ‘ముందు అయితే గ్రాడ్యుయేషన్ పూర్తిచెయ్యి​ తర్వాత చూద్దాం’ అన్నారు. దాంతో చదువు మీద కాన్​సన్​ట్రేట్​ చేశా. ఇంజినీరింగ్​ పూర్తయ్యాక ఒక సాఫ్ట్​వేర్​ కంపెనీలో ఉద్యోగం వచ్చింది. కొన్నాళ్లు  పనిచేశాక నా కల నెరవేర్చుకోవాలని డిసైడ్ అయ్యా. దాంతో జాబ్​కి రిజైన్​ చేసి, యాక్టింగ్​ ఫీల్డ్​లోకి అడుగుపెట్టా.

సినిమా అంటే థియేటర్​లోనే..

ఖాళీ టైం దొరికితే బయటకు వెళ్లడం ఇష్టం ఉండదు. షూటింగ్స్ లేనప్పుడు ఇంట్లోనే ఉంటా. ఇంతకుముందు అయితే థియేటర్​కి వెళ్లి సినిమాలు చూడడం బాగా ఎంజాయ్​ చేసేదాన్ని. కానీ, యాక్టర్ అయ్యాక థియేటర్​కు వెళ్లడం కుదరడంలేదు. అది మిస్ అవుతున్నా. థియేటర్​లో సినిమా చూస్తే వచ్చే మజానే వేరు. థియేటర్​లో తప్ప ఎక్కడ చూసినా ఆ ఫీల్​ రాదు. మొదటిసారి థియేటర్​లో సినిమా చూసింది నేను ఏడో తరగతి చదివేటప్పుడు. అదికూడా ఫ్రెండ్స్​తో వెళ్లా. ఆ రోజు ఎంత ఎంజాయ్​ చేశానో చెప్పాలంటే మాటలు చాలవు. నాకు ‘దళపతి’ విజయ్ అంటే చాలా ఇష్టం. ఆయన సినిమాలు ఫస్ట్​ డే... ఫస్ట్​ షో చూడాల్సిందే. అలాగే రజినీకాంత్, అజిత్ సినిమాలు కూడా మొదటిరోజే చూసేదాన్ని. ఈలలు వేస్తూ, చప్పట్లు కొడుతూ, అరుస్తూ.. సినిమా చూస్తే భలేబాగుంటుంది. అలా ఎంజాయ్ చేస్తూ సినిమా చూడటం అనే ఫీలింగ్​ను మాటల్లో చెప్పలేను. లాక్​డౌన్​కి ముందు వచ్చిన నా సినిమా ‘నాన్ సిరితల్’. ఆ సినిమాని మా టీం, అమ్మానాన్నలతో కలిసి చూశా.

ఫిట్​నెస్ జర్నీ

స్క్రీన్​మీద నన్ను చూసిన వాళ్లలో చాలామంది నా ఫిట్​నెస్​ గురించి అడుగుతుంటారు. ఆ జర్నీ గురించి చెప్పబోయే ముందు మీకో విషయం చెప్పాలి. లావుగా ఉన్నామని బాధపడేవాళ్లకి నా ఫిట్​నెస్ జర్నీ తప్పక ఇన్​స్పిరేషన్​ ఇస్తుంది. చిన్నప్పుడు నేను బొద్దుగా ఉండేదాన్ని. స్కూల్లో నన్ను అందరూ ఫ్యాట్​ గర్ల్ అని పిలిచేవాళ్లు. ‘మైదా పిండి ముద్దలా ఉన్నావ్​’ అంటూ కామెంట్స్ చేసేవాళ్లు. నన్ను చూసి ఎగతాళిగా నవ్వేవాళ్లు. అదంతా నాకు చాలా చిరాకు తెప్పించేది. ఆ కామెంట్స్​ తీసుకోలేకపోయేదాన్ని. అలాగని వెంటనే వాళ్లకు రిటార్ట్​ ఇచ్చేదాన్ని కాదు. చిన్నప్పుడు నేను అమాయకంగా ఉండేదాన్ని. అందుకే వాళ్లు నన్ను ఏ కామెంట్​ చేసినా రియాక్ట్​ అయ్యేదాన్ని కాదు. కానీ, నా మైండ్​లో మాత్రం వాళ్ల మాటలు పట్టించుకోవద్దు అనుకునేదాన్ని. 
నా గుర్తింపు ‘లావు’ కాదు. ఇకమీదట నా లావుతో నన్ను గుర్తించకూడదు అనుకున్నా. దాంతో పదహారేండ్ల వయసు నుంచి ఫిట్​నెస్ జర్నీ మొదలుపెట్టా. అప్పటి నుంచి బాగా కష్టపడ్డా. స్ట్రిక్ట్​గా డైట్​ ఫాలో అయ్యా. దాంతో చాలా సన్నగా అయ్యా. చెప్పాలంటే నా లైఫ్​లో అదంతా ఒక ఫేజ్​. కానీ ఆ తర్వాత రియలైజ్​ అయ్యా. వేరేవాళ్లను ఇంప్రెస్​ చేయాల్సిన అవసరం నాకేంటి అనుకున్నా. నాకు నేను ఎలా నచ్చితే అలానే ఉండాలి అనుకున్నా. లావు, సన్నం కాదు హెల్దీగా, ఫిట్​గా ఉండాలి. ఆ ఆలోచన వచ్చాక వర్కవుట్స్ మొదలుపెట్టా. ఫిట్​గా తయారయ్యా. ఇప్పుడు ఫిట్​నెస్ అనేది నా లైఫ్ స్టయిల్​లో ఒక పార్ట్​. ఫిట్​నెస్​ విషయంలో నాలో ఇంత పాజిటివ్​ మార్పు రావడానికి కారణమైన వాళ్లకి... అంటే ‘నువ్వు లావుగా ఉన్నావ’ని నన్ను విమర్శించిన వాళ్లందరికీ ‘థ్యాంక్స్’. వాళ్లలా అనడం వల్లే ఫిట్​నెస్​ని సీరియస్​గా తీసుకున్నా. నేను భరతనాట్యం డాన్సర్​ను. పాటలు బాగా పాడతా. ఇన్ని చేయగలుగుతున్నానంటే కారణం మా అమ్మ. ఆమే నా రోల్​మోడల్” అని చెప్పింది ఐశ్వర్య.
‌‌– ప్రజ్ఞ 

అప్పుడు మొదలైంది

2012లో మొదలుపెట్టా. తమిళ టెలివిజన్ సీరియల్​ ‘తెండ్రల్’లో శ్రుతి అనే మైనర్​ గర్ల్ రోల్​ చేశా. అదే ఏడాది తెలుగులో ‘లవ్​ ఫెయిల్యూర్’ సినిమాలో చేశా. అదే తమిళంలో ‘కాదలిల్ సోదప్పువ్వదు యెప్పడి’ పేరుతో విడుదలైంది. తర్వాత ఏడాది తమిళంలో తల్లీకూతుళ్ల రిలేషన్​షిప్​ ఆధారంగా వచ్చిన ‘యాపిల్ పెన్నె’లో నటించా. ఆ సినిమాకి మంచి ప్రశంసలు వచ్చాయి. అదే ఏడాది ‘తీయ వెలై సెయియ్యానుమ్ కుమరు’ అనే సినిమాలో చేశా. కన్నడ సినిమాలో ‘దసవల’ అనే  ‘అక్షర’ పాత్రతో పరిచయమై, హారర్​ కామెడీగా తెరకెక్కిన ‘నమో భూతాత్మ’ సినిమాలో కూడా నటించా. మలయాళంలో ‘మాన్​సూన్ మ్యాంగోస్’ పేరుతో వచ్చిన సినిమాలో ఫహాద్​ ఫాజిల్​తో నటించా. ఇందులో నాది ప్రాక్టికల్​గా ఆలోచించే ఇండిపెండెంట్​ విమెన్ పాత్ర. నా నటనని మలయాళ ఆడియెన్స్ బాగా రిసీవ్​ చేసుకున్నారు. మొదటి సినిమాతోనే స్టార్​ హీరో పక్కన నటించడం నా అదృష్టం. 

ఆ తర్వాత ‘వీర’, ‘తమిజ్ పడం 2’, ‘నాన్ సిరితల్​’, ‘వేజమ్’ వంటి సినిమాల్లో నటించా. ప్రస్తుతం తెలుగులో పాన్​ ఇండియా స్థాయిలో విడుదలైన ‘స్పై’ మూవీతో తెలుగు ప్రేక్షకుల ముందుకు వచ్చా. ఒక టైంలో స్క్రిప్ట్​లు సెలక్ట్​ చేసుకోవడంలో బాగా శ్రద్ధ పెట్టా. అలా ఒక ఏడాది గ్యాప్​ తర్వాత ‘తమిళ పడం2’లో చేశా. కన్నడలో నమో  భూతాత్మ చేసేటప్పుడు ఆ ప్రొడ్యూసర్స్​కి నా వర్క్​ బాగా నచ్చింది. దాంతో ‘వీర’ సినిమా కోసం స్క్రీన్ టెస్ట్​కి వెళ్లమన్నారు. స్క్రీన్​ టెస్ట్​ ద్వారా అవకాశం రావడంతో గర్వంగా ఫీలయ్యా. సినిమాల్లోనే కాకుండా అరుణ్​ విజయ్ నటించిన ‘తమిళ్ రాకర్జ్’​ అనే వెబ్​ సిరీస్​లో కూడా నటించా.