ఉత్తరప్రదేశ్‌లోని మథురలో ఓ షాకింగ్ ఘటన జరిగింది. ఓ రెస్టారెంట్ బార్‌లో బిల్లు విషయంలో మాటామాటా పెరిగి పెద్ద కొట్లాటగా మారింది. ఈ గొడవ అంతా వీడియోలో రికార్డ్ కావడంతో సోషల్ మీడియాలో వైరల్ అయింది.
సమాచారం ప్రకారం మథురకు చెందిన ఓ కుటుంబం ఓ రెస్టారెంట్‌లో పార్టీ చేసుకుంది. పార్టీ అయిపోయాక 30వేల బిల్లుపై రెస్టారెంట్ సిబ్బందితో వాదన మొదలైంది.
ఈ గొడవలో హోటల్ సిబ్బంది, బౌన్సర్లు ఒక్కసారిగా రెచ్చిపోయి మాపై దాడి చేశారని కుటుంబ సభ్యులు చెబుతున్నారు. వీడియోలో కస్టమర్లు సిబ్బంది తిట్టుకుంటూ, కొట్టుకుంటుండగా... ఆడవాళ్లు వారిని ఆపడానికి ప్రయత్నించడం కనిపిస్తుంది. ఓ వ్యక్తిని బౌన్సర్లు కర్రతో కొడుతున్నట్లు కూడా చూడొచ్చు...
బౌన్సర్లు కేవలం మగవాళ్లపైనే కాకుండా, ఆడవాళ్లపై కూడా దాడి చేసేందుకు ప్రయత్నించారని కుటుంబ సభ్యులు ఆరోపించారు.
ఈ గొడవలో కుటుంబ సభ్యుల్లో చాలా మందికి గాయాలయ్యాయని, కొంతమంది మహిళలకు తీవ్ర దెబ్బలు తగిలాయని బాధితులు తెలిపారు.
అయితే బాధితులు పోలీసులకు అధికారికంగా ఫిర్యాదు చేయకపోగా... వైరల్ అయిన వీడియో, సీసీటీవీ ఫుటేజీలను క్షుణ్ణంగా పరిశీలిస్తున్నామని పోలీసులు తెలిపారు. విచారణ ఆధారంగా బౌన్సర్లపై కఠిన చర్యలు తీసుకుంటామని పోలీసులు తెలిపారు.
