- పెద్ద మొత్తంలో భూములు సేకరించాలని నిర్ణయం
హైదరాబాద్, వెలుగు : గ్రేటర్ సిటీ పరిధిలో హెచ్ఎండీఏ భారీ లే అవుట్స్ ప్లాన్ చేస్తోంది. పెద్ద మొత్తంలో ల్యాండ్పూలింగ్కు సన్నాహాలు ప్రారంభించింది. ప్రత్యేకించి మధ్య తరగతి ప్రజలను దృష్టిలో పెట్టుకుని, ప్లాట్లను విక్రయించాలని అధికారులు కసరత్తు చేస్తున్నారు. భూములన్న రైతులతో మట్లాడుతున్నారు. ఇప్పటివరకు అధికారులు గుర్తించిన భూముల్లో అధిక శాతం సాగులో లేని, అసైన్డ్ భూములు ఎక్కువగా ఉన్నాయి.
వారిని ఒప్పించి భూములను సేకరించాలని నిర్ణయించారు. 60 శాతం భూమిని డెవలప్చేసి రైతులకు ఇచ్చి, మిగిలిన 40 శాతం భూములను హెచ్ఎండీఏ వేలం ద్వారా విక్రయించనుంది. బడ్జెట్లో మౌలిక సదుపాయాల కల్పనకు రాష్ట్ర ప్రభుత్వం హెచ్ఎండీఏకు రూ.500 కోట్లు కేటాయించింది. ఈ నిధులతో ఆయా ప్రాంతాల్లో సేకరించిన భూములను అభివృద్ధి చేయాలని అధికారులు నిర్ణయించారు.
నాలుగు నెలల కింద రంగారెడ్డి జిల్లా పరిధిలోని ఇనుముల్ నర్వ, మేడ్చల్జిల్లా పరిధిలోని భోగారంతోపాటు, ప్రతాప సింగారం, లేమూరులో దాదాపు 500 ఎకరాలను సేకరించాలని నిర్ణయించారు. తాజాగా ఓఆర్ఆర్, ట్రిపుల్ఆర్మధ్యన చౌటుప్పల్ మండల పరిధిలోని దండు మల్కాపూర్లో 325 ఎకరాలు, నాదర్గుల్లో 91 ఎకరాలు, ప్రతాపసింగారంలో 152 ఎకరాలు, భోగారంలో 125 ఎకరాలు కలిపి మేడ్చల్, రంగారెడ్డి, సంగారెడ్డి పరిధిలో మొత్తం 1000 ఎకరాలు సేకరించాలని అధికారులు నిర్ణయించారు. ఆయా ప్రాంతాల్లో సామాన్య, మధ్యతరగతి ప్రజలకు అందుబాటులో ఉండేలా 150, 200, 250, 300 స్క్వేర్యార్డు సైజుల్లో ప్లాట్లను వేసి వేలం వేయాలని అధికారులు నిర్ణయించారు.
