హైదరాబాద్, వెలుగు: హైదరాబాద్ పరిధిలో పుంజుకుంటున్న రియల్ ఎస్టేట్ ను దృష్టిలో పెట్టుకుని హెచ్ఎండీఏ అందుకు తగ్గట్టుగా ప్రణాళికలు సిద్ధం చేసుకుంటోంది. గతంలో ఎన్నడూ లేనివిధంగా పెరుగుతున్న రియల్జోరును సద్వినియోగం చేసుకుని ఆదాయాన్ని సమకూర్చుకునేందుకు అధికారులు సిద్ధం అవుతున్నారు. అందుకు అనుగుణంగానే ప్రస్తుతం హెచ్ఎండీఏ పరిధిలోని జోన్ల సంఖ్యను పెంచేందుకు అవసరమైన చర్యలు తీసుకుంటున్నారు. ఈ మేరకు ఇప్పటికే ప్రపోజల్ను ప్రభుత్వానికి అధికారులు పంపించారు. ప్రభుత్వం తీసుకునే నిర్ణయం కోసం ఎదురు చూస్తున్నారు.
తెరపైకి కొత్త జోన్లు..
హెచ్ఎండీఏ పరిధిలో పెరిగిన రియల్ ఎస్టేట్ జోరుతో భవిష్యత్లో భారీగా దరఖాస్తులు వస్తాయని అధికారులు భావిస్తున్నారు. అందుకు అనుగుణంగా చర్యలు తీసుకుంటేనే సంస్థకు భారీగా ఆదాయం వస్తుందని అంటున్నారు. సాధారణంగా పంచాయతీలు, మున్సిపాలిటీలు, కార్పొరేషన్లకు 5 ఫ్లోర్ల వరకే అనుమతులు ఇచ్చే అధికారం ఉంటుంది. జీహెచ్ఎంసీకి 10 అంతస్తుల వరకు పర్మిషన్ ఇస్తోంది.
అయితే హైరైస్ భవనాల నిర్మాణాలకు హెచ్ఎండీఏ అనుమతులు తప్పని సరి. ప్రస్తుతం హెచ్ఎండీఏ పరిధిలో శంకర్పల్లి, శంషాబాద్, ఘట్కేసర్, మేడ్చల్ జోన్లు ఉన్నాయి. ఆయా జోన్ల పరిధిలో నిర్మించే భారీ భవనాల నిర్మాణాలకు పెద్ద సంఖ్యలో దరఖాస్తులు వస్తున్నట్లు ఆఫీసర్లు తెలిపారు. వీటిలో హైరైస్భవనాలు, వెంచర్లు, లే అవుట్లు ఉన్నట్టు తెలిపారు.
ప్రస్తుతం ఉన్న నాలుగు జోన్ల స్థానంలో 8 జోన్లు చేయాలని అధికారులు ప్రతిపాదించారు. ప్రస్తుతం ఉన్న నాలుగు జోన్ల పరిధిలో 20 నుంచి 25 మంది ప్లానింగ్ ఆఫీసర్లు, అసిస్టెంట్ ప్లానింగ్ ఆఫీసర్లు ఉన్నారు. రోజు రోజుకూ పెరుగుతున్న దరఖాస్తులను పరిశీలించడం, మంజూరు చేసే విషయంలో ఆలస్యం అవుతోంది. ప్రతి దరఖాస్తును పరిశీలించేప్పుడు అవసరమైతే ఫీల్డ్ విజిట్చేయాలి. దీంతో దరఖాస్తులు పరిశీలించి, పర్మిషన్లు ఇవ్వడంఆలస్యమవుతోంది.
ఈ నేపథ్యంలో జోన్ల సంఖ్యను పెంచడం వల్ల అధికారులపై పని ఒత్తడి తగ్గే అవకాశం ఉంటుందని భావిస్తున్నారు. ప్రతి జోన్ పరిధిలో పారిశ్రామిక, నివాస, వ్యవసాయ, ఉత్పత్తి రంగాల అభివృద్ధికి మాస్టర్ప్లాన్లో భూ కేటాయింపులు జరుగుతాయి. వాటికి అనుగుణంగానే అక్కడ లే అవుట్లు, ఇతర నిర్మాణాలకు అనుమతులు ఇస్తుంటారు. కాబట్టి కొత్త జోన్లను ఏర్పాటు చేసి పెరుగుతున్న రియల్ఎస్టేట్ అనుగుణంగా నగరాన్ని తీర్చిదిద్దాలని అధికారులు భావిస్తున్నారు.
పరిధి ఎక్కువగా ఉండడంతో..
హెచ్ఎండీఏ పరిధిలో హైదరాబాద్తో కలుపుకుని మేడ్చల్, రంగారెడ్డి, భువనగిరి, మెదక్, సిద్దిపేట, సంగారెడ్డి జిల్లాలు ఉన్నాయి. 849 గ్రామాలు, 7,228 చ. కి.మీలో విస్తరించి వుంది. త్వరలో రీజినల్ రింగ్ రోడ్(ఆర్ఆర్ఆర్)ను ప్రభుత్వం ఏర్పాటు చేయబోతున్న నేపథ్యంలో హెచ్ఎండీఏ పరిధిని మరింత విస్తరించాలని నిర్ణయించింది. దీంతో మరో 75 చ.కి.మీ. పరిధి పెరిగే అవకాశం ఉంటుందని అధికారులు తెలిపారు.
భారీ భవనాలు, వివిధ వెంచర్లతో పాటు లేవుట్లకు హెచ్ఎండీఏ అనుమతి తప్పని సరి. ప్రస్తుతం గ్రేటర్ పరిధిలో రియల్ఎస్టేట్ భారీగా పుంజుకుంటున్న నేపథ్యంలో హెచ్ఎండీఏ పాత్ర కీలకం కానుంది. హెచ్ఎండీఏ పట్టణ ప్రణాళిక సంస్థ కావడంతో, రియల్ ఎస్టేట్రంగంలో వచ్చే మార్పులను కూడా నిశితంగా గమనిస్తూ మార్పులు చేసుకుంటూ ముందుకు పోతోంది.
ఇటీవల భారీ నిర్మాణాల కోసం అనుమతులు కోరుతూ పెద్ద సంఖ్యలో దరఖాస్తులు వస్తున్నాయి. దీంతో ప్రతి రెండు నుంచి మూడు నెలలకోసారి జరిగే మల్టీస్టోరీడ్ బిల్డింగ్ కమిటీ సమావేశాన్ని కూడా ఇప్పుడు వారానికోసారి నిర్వహిస్తున్నారు. గత మూడేండ్లలో లక్షకు పైగానే నిర్మాణాలకు అనుమతులు ఇవ్వగా, వెంచర్లు, లే అవుట్లకు కూడా భారీగా పర్మిషన్లు ఇచ్చినట్లు ఆఫీసర్లు చెబుతున్నారు.
