వాషింగ్టన్(డీసీ): జాబిల్లిపైన జనావాసాల ఏర్పాటు దిశగా నాసా సైంటిస్టులు ప్రయత్నాలు ప్రారంభించారు. చంద్రుడిపైకి ఇప్పటికే వ్యోమగాములను పంపించిన నాసా.. త్వరలో అక్కడ త్రీడీ ఇండ్లను నిర్మించనుంది. అపోలో మిషన్ లలో భాగంగా నీల్ ఆర్మ్స్ట్రాంగ్ సహా పలువురు వ్యోమగాములను చందమామపైకి విజయవంతంగా పంపించింది. ఇప్పటి వరకు చంద్రుడిపై అడుగుపెట్టిన ఆస్ట్రోనాట్లు అక్కడ 75 గంటల పాటు గడిపారు.
ఈ సమయాన్ని మరింత పెంచి, అక్కడ శాశ్వత నివాసాలు ఏర్పరుచుకునే ప్రయత్నంలో భాగంగా సరికొత్త ప్రాజెక్టును చేపడుతోంది. 2040 నాటికి జాబిల్లిపై పూర్తిస్థాయిలో నివాసాలను ఏర్పాటు చేయాలనే టార్గెట్ తో పనిచేస్తున్నట్లు నాసా సైంటిస్టులు వెల్లడించారు. ఇందులో భాగంగా వారు ఓ ప్రత్యేకమైన త్రీడీ ప్రింటర్ ను తయారుచేశారు. చంద్రుడి ఉపరితలంపై లభించే మినరల్స్, అక్కడి రాళ్లను ఉపయోగించుకుని ఈ ప్రింటర్ కాంక్రీట్ ను తయారుచేస్తుందని చెప్పారు.
ఆపై త్రీడీలో ఇంటిని తయారుచేస్తుందని వివరించారు. ప్రస్తుతం ఈ మిషన్ పై ప్రయోగాత్మక పరీక్షలు నిర్వహిస్తున్నట్లు పేర్కొన్నారు. ఈమేరకు న్యూయార్క్ టైమ్స్ ఓ కథనాన్ని ప్రచురించింది.
