రోజూ కంప్యూటర్ వాడుతుంటారు. కానీ.. కొన్ని షార్ట్ కట్స్, ఈజీ ట్రిక్స్ కొందరికి తెలియవు. ఒక్కోసారి ఇంపార్టెంట్ వర్క్ చేస్తున్నప్పుడు సడెన్గా సిస్టమ్ స్ట్రక్ అవుతుంది. అప్పుడేం చేయాలి? స్టయిల్ కోసం, రకరకాలుగా పనికొస్తుందని స్మార్ట్ వాచ్, రిస్ట్ బ్యాండ్ వాడుతుంటారు. మరి వాటిని క్లీన్ చేస్తున్నారా? రోజూ క్లీన్ చేయడం కష్టం అంటున్నారా? అలాగని క్లీన్ చేయకపోతే తిప్పలు చేతిలో పట్టుకుని తిరిగినట్టే మరి.
కంప్యూటర్ స్ట్రక్ అయితే...
కంప్యూటర్లో విండోస్10 లేదా11 వెర్షన్స్లో కొన్నిసార్లు సడెన్గా అప్లికేషన్స్ పనిచేయడం ఆగిపోతాయి. సిస్టమ్ కూడా అప్పుడప్పుడు స్ట్రక్ అయిపోతుంది. అలాంటప్పుడు కంట్రోల్, ఆల్ట్, డిలీట్ కీస్ని లేదా కంట్రోల్, షిఫ్ట్, ఎస్కేప్ బటన్ ఒకేసారి నొక్కుతారు. వీటితోపాటు మరొక పని కూడా చేయొచ్చు.
- ఎమర్జెన్సీ రీస్టార్ట్ ఆప్షన్ వాడొచ్చు. కంట్రోల్, ఆల్ట్, డిలీట్ కలిపి నొక్కినప్పుడు కనిపించే స్క్రీన్ మీద లుక్, స్విచ్ యూజర్, సైన్ ఆఫ్, టాస్క్ మేనేజర్ ఆప్షన్లు కనిపిస్తాయి. అవి కాకుండా, కింద ఎడమ వైపు మూలన పవర్ బటన్ ఉంటుంది. దీని ద్వారా సీక్రెట్ ఫంక్షన్స్ వాడొచ్చు. అందుకోసం కంట్రోల్ నొక్కి పట్టి పవర్ బటన్ మీద క్లిక్ చేస్తే ‘క్లిక్ ఓకే టు ఇమిడియెట్లీ రీస్టార్ట్ ఎనీ అన్సేవ్డ్ డాటా విల్ బీ లాస్ట్’ అనే మెసేజ్ కనిపిస్తుంది. ‘ఓకే’ బటన్ మీద క్లిక్ చేస్తే కంప్యూటర్ రీస్టార్ట్ అవుతుంది.
- షట్ డౌన్ విండోస్ డైలాగ్ బాక్స్ యాక్సెస్ చేయడం ద్వారా పీసీని రీస్టార్ట్ చేయొచ్చు. విండోస్, డి కీస్ను కలిపి నొక్కాలి. తర్వాత ఆల్ట్, ఎఫ్ కీ కలిపి నొక్కితే షట్ డౌన్ విండోస్ బాక్స్ కనిపిస్తుంది. డ్రాప్ డౌన్ మెనూలో రీస్టార్ట్ ఆప్షన్ సెలక్ట్ చేసి, ఓకే బటన్ని క్లిక్ చేయాలి.
- టాస్క్ బార్ మీద విండోస్ గుర్తు క్లిక్ చేసి, సెర్చ్ బాక్స్లో ‘సీఎండీ’ అని టైప్ చేయాలి. కమాండ్ ప్రాంప్ట్ సింబల్ మీద రైట్ క్లిక్ చేసి, ‘రన్ యాజ్ అడ్మినిస్ట్రేటర్’ ఆప్షన్ సెలక్ట్ చేయాలి. తర్వాత కమాండ్ ప్రాంప్ట్లో షట్డౌన్ –---ఆర్ అని టైప్ చేసి రన్ చేయాలి. వార్నింగ్ మెసేజ్ కనిపిస్తే ‘క్లోజ్’ మీద క్లిక్ చేయాలి. పీసీ 60 సెకండ్స్లో షట్ డౌన్ అయ్యి రీస్టార్ట్ అవుతుంది.
స్మార్ట్తో జాగ్రత్త
ఈ మధ్య స్మార్ట్ వాచ్లు, రిస్ట్ బ్యాండ్లు ఎక్కువగా వాడుతున్నారు. వాడటం వరకు ఓకే కానీ వాటిని ఎప్పుడైనా శుభ్రం చేస్తున్నారా? లేదంటే లేనిపోని రోగాలు వస్తాయంటున్నారు రీసెర్చర్లు. అమెరికాకు చెందిన ఫ్లోరిడా అట్లాంటిక్ యూనివర్సిటీ (ఎఫ్ఏయూ)కి చెందిన ఒక టీం ప్లాస్టిక్, రబ్బర్, క్లాత్, లెదర్, మెటల్ (గోల్డ్, సిల్వర్) రిస్ట్ బ్యాండ్ల మీద రీసెర్చ్ చేసింది. వీటిలో ఏ మెటీరియల్ బ్యాక్టీరియాను ఎక్కువగా అట్రాక్ట్ చేస్తుందో పరిశీలించారు. 95 శాతం రిస్ట్ బ్యాండ్ల మీద ప్రమాదకరమైన బ్యాక్టీరియా ఉంది.
అందులో కూడా 85 శాతం స్టెఫైలోకోకస్ జాతికి చెందిన బ్యాక్టీరియా ఉంది. అది స్టెఫె ఇన్ఫెక్షన్ కలిగిస్తుంది. దీనివల్ల చర్మం పై ఎరుపు రంగులో దద్దుర్లు రావడం, వాపు వంటివి కనిపిస్తాయి. అలాగే 60 శాతం ఇ–కొలి బ్యాక్టీరియా, 30 శాతం సూడోమోనస్ బ్యాక్టీరియా ఉందని తేలింది. ఇలాంటి బ్యాక్టీరియాలు న్యుమోనియా, బ్లడ్ ఇన్ఫెక్షన్స్ కలిగిస్తాయి. అయితే రబ్బర్, ప్లాస్టిక్ రిస్ట్ బ్యాండ్స్లో ఎక్కువ మొత్తంలో బ్యాక్టీరియా ఉంది.
కానీ... గోల్డ్, సిల్వర్ వంటి మెటల్ బ్యాండ్స్ మీద చాలా తక్కువ బ్యాక్టీరియా ఉంది. కొన్నింటికైతే అసలు బ్యాక్టీరియానే అంటుకోలేదు. క్లాత్> ప్లాస్టిక్> రబ్బర్ > లెదర్ > మెటల్ – ఈ వరుస క్రమాన్ని గుర్తుపెట్టుకుంటే ఇన్ఫెక్షన్లకు ఎలా దూరం ఉండాలో తెలిసిపోతుంది.
ఇలా చేస్తే...
శుభ్రం చేసేందుకు లైజాల్ డిస్ఇన్ఫెక్టెంట్ స్ర్పే, హాస్పిటల్స్లో కామన్గా వాడే ఆల్కహాల్ వైప్స్, యాపిల్ సిడార్ వెనిగర్ ఎఫెక్టివ్గా పనిచేస్తున్నాయని ఆ రీసెర్చ్ చెప్పింది. పై మూడు 30 సెకన్లలోనే 99.99శాతం బ్యాక్టీరియాను చంపేస్తున్నాయి. యాపిల్ సిడార్ వెనిగర్ మాత్రం బ్యాక్టీరియాను చంపేందుకు రెండు నిమిషాల టైం తీసుకుందట.