న్యూయార్క్: ఐడా సృష్టించిన బీభత్సంతో అతలాకుతలమైన అమెరికా ఇప్పుడిప్పుడే కుదుటపడుతోంది. తుఫాన్ ధాటికి శుక్రవారం నాటికే 49 మంది మృతి చెందగా.. ఆయా రాష్ట్రాల్లో పదుల సంఖ్యలో ప్రజలు గల్లంతైనట్లు తెలుస్తోంది. టోర్నడోల ధాటికి న్యూజెర్సీ, న్యూయార్క్, పెన్సిల్వేనియా, వెస్ట్చెస్టర్, మేరీలాండ్ రాష్ట్రాల్లో పెద్ద ఎత్తున ప్రాణ, ఆస్తి నష్టం జరిగింది. న్యూయార్క్లో ఆఫీసర్లు ఇంటింటికీ తిరుగుతూ.. ఎవరైనా గల్లంతయ్యారో లేదో వివరాలు సేకరిస్తున్నారు. వాతావరణం కొంత శాంతించినా ఆయా ప్రాంతాల్లో నదులు మాత్రం ఇంకా ఉధృతంగానే ప్రవహిస్తున్నాయి. నార్త్ఈస్ట్లో ఏడు నదులు రికార్డు స్థాయి నీటిమట్టానికి చేరుకున్నట్లు డార్ట్మౌత్ కాలేజీ రీసెర్చర్ ఇవాన్ డెథియర్ తెలిపారు. న్యూయార్క్లో ఒక గంటలోనే 7.5 సెంటీమీటర్ల వర్షం కురవడంతో డ్రైనేజీ సామర్థ్యం సరిపోక ఇండ్లకు వరద పోటెత్తింది.
న్యూజెర్సీలో కనీసం 25 మంది వరకు చనిపోయారని ఆ రాష్ట్ర గవర్నర్ ఫిల్మర్ఫి తెలిపారు. ఎలిజబెత్లోని ఓ అపార్ట్మెంట్లో 4 మీటర్ల మేర నీరు నిలువడంతో ఓ ఫ్యామిలీ అందులో మునిగి ప్రాణాలు కోల్పోయిందని, గల్లంతైన వారు రాష్ట్ర వ్యాప్తంగా పదుల సంఖ్యలో ఉంటారని మర్ఫి వెల్లడించారు. న్యూయార్క్ సబ్వేలు ప్రారంభం కాలేదు. హడ్సన్ వ్యాలీలో ట్రాక్పై అడుగుల మేర బురద పేరుకుపోయింది. వచ్చే వారానికైనా సేవలు అందుబాటులోకి వచ్చేలా లేవని మెట్రో-నార్త్ ప్రెసిడెంట్ కేథరీన్ రినాల్డి తెలిపారు. ఐడా ధాటికి లూసియానాలోని మిసిసిప్పి ఎలక్ట్రిక్గ్రిడ్ ధ్వంసం కావడంతో 8 లక్షలకు పైగా ప్రజలు చీకటిలోనే గడిపారు. గత నాలుగేండ్లలో సంభవించిన తుఫాన్లలో ఐడా అత్యంత దారుణమైనదిగా నిలిచింది. ఫిలాడేల్ఫియాలో 1902 తర్వాత షుయ్కిల్ రివర్ అత్యధిక స్థాయిలో ప్రవహించడంతో క్రాస్‌‌‌‌స్టౌన్ వైన్ స్ట్రీట్ ఎక్స్‌‌‌‌ప్రెస్‌ వే కొంత భాగం వరదతో నిండిపోయింది. వరద తగ్గాక రోడ్డుపై ఇంచ్మందంతో బురద పేరుకుపోయింది. రెండు రోజుల్లో మేడ్ ఇన్ అమెరికా మ్యూజిక్ ఫెస్టివల్ ఉంది. దీని కోసం వేలాది మంది ప్రజలు ఎదురుచూస్తున్న నేపథ్యంలో శనివారం మధ్యాహ్నం కల్లా హైవేను పునరుద్ధరించనున్నట్లు అధికారులు చెప్పారు.
