సాంకేతిక కారణాల వల్ల హైదరాబాద్ వేదికగా జరుగుతున్న ఇండియా కార్ రేసింగ్ లీగ్ అర్ధాంతరంగా నిలిచిపోయింది. నిన్న (శనివారం) టెస్ట్ రేసులు సజావుగానే జరగగా.. ఇవాళ (ఆదివారం) రేసర్లకు వరుస ప్రమాదాలు జరిగాయి. దీంతో పూర్తి స్థాయిలో రేస్ లు నిర్వహించలేకపోయారు. క్వాలిఫయింగ్ రేసులో కొత్త ట్రాక్ పై పలుమార్లు కార్లు ఢీకొని రేసర్లకు గాయాలయ్యాయి. ఈనేపథ్యంలో లీగ్ నిర్వహణను ఆపేస్తున్నట్లు నిర్వాహకులు ప్రకటించారు. వరుస ప్రమాదాలపై దర్యాప్తు చేస్తామని వెల్లడించారు. కొత్త ట్రాక్ పై అలవాటు లేకపోవడం వల్లే ప్రమాదాలు జరిగినట్లు తెలుస్తోంది. ట్రాక్ సరిగ్గా లేకపోవడంతో ఫార్ములా-3 రేస్ రద్దు చేసి.. ఫార్ములా-4 రేస్ తో సరిపెట్టారు. ఈ అనూహ్య నిర్ణయంతో ఆదివారం వేళ ఇంటర్నేషనల్ ఈవెంట్ చూద్దామని వచ్చిన ఎంతోమంది అభిమానులు నిరాశతో వెనుదిరిగారు.
క్వాలిఫైయింగ్ రేసులో చెన్నై టీమ్ కు చెందిన రేసర్ కు గాయాలయ్యాయి. తర్వాత ఫార్ములా-4 రేసింగ్ లోనూ యాక్సిడెంట్ జరిగింది. టర్నింగ్స్ దగ్గర స్పీడ్ కంట్రోల్ తప్పడంతో ప్రమాదం జరిగింది. ఒక టర్నింగ్ దగ్గర మూడు కార్లు ఢీకొన్నాయి. దీంతో రేసింగ్ కు కాసేపు అంతరాయం ఏర్పడింది. కొంత గ్యాప్ తర్వాత ఫార్ములా-4 రేసు పోటీలు జరిపారు. లైటింగ్ తగ్గడంతో.. ఫార్ములా -3 రేస్ క్వాలిఫయింగ్ జరపకుండానే లీగ్ ను ముగించారు.
