- విచారణలో విస్తుపోయే నిజాలు
జూబ్లీహిల్స్, వెలుగు: బటన్ నొక్కితే కారు నంబర్ ప్లేట్లను మార్చే ప్రత్యేక ఎలక్ట్రానిక్ డివైస్ను వాహనానికి అమర్చిన డాక్టర్ గౌతమ్ రెడ్డి (29)ని బుధవారం జూబ్లీహిల్స్ పోలీసుల విచారించారు. ఈ సందర్భంగా పలు ఆసక్తికర విషయాలను వెల్లడించాడు. అశోక్ నగర్కు చెందిన గౌతమ్ రెడ్డి ఓ ప్రైవేట్ ఆసుపత్రిలో డాక్టర్గా పనిచేస్తూ లగ్జరీ కార్లపై ఆసక్తి పెంచుకున్నాడు. ఢిల్లీలో రెండు లగ్జరీ కార్లను కొనుగోలు చేశాడు. అయితే, వాటిని తెలంగాణలో రిజిస్ట్రేషన్ చేసుకుంటే రూ. 10 లక్షల వరకు ఖర్చవుతుందని భావించి ఈ అడ్డదారి తొక్కాడు.
ట్రాఫిక్ చలాన్ల నుంచి తప్పించుకునేందుకు కారులో బటన్ నొక్కగానే నంబర్ ప్లేట్ ఆటోమేటిక్గా మారిపోయే డివైస్ను అమర్చి కొన్నాళ్లుగా పోలీసుల కళ్లు గప్పి తిరుగుతున్నాడు. గత శనివారం రాత్రి జూబ్లీహిల్స్లోని ఓ పబ్ నుంచి మద్యం సేవించి బయటకు వచ్చిన గౌతమ్ రెడ్డిని పోలీసులు ఆపి తనిఖీ చేయగా, అసలు విషయం బయటపడింది. ఇంటి దగ్గర ఉండే మరో బీఎండబ్ల్యూ కారుకు కూడా ఇలాంటి డివైస్నే అమర్చినట్లు విచారణలో అంగీకరించాడు. మొదట కొద్దిరోజులు ఇలా తిరుగుతున్నప్పటికీ ఎవరూ గుర్తుపట్టకపోవడంతో దాన్నే కంటిన్యూ చేశానని పేర్కొన్నాడు.
