- పొద్దున్నే ఆర్డర్ కాపీతో వచ్చిన ఓయూ ఫ్రొఫెసర్ నిర్మలాదేవి
- మధ్యాహ్నానికి పోస్టింగ్ రద్దు చేస్తూ ఓయూ నుంచి ఉత్తర్వులు
- రద్దు విషయం పై స్పందించని నిర్మలాదేవి
నిజామాబాద్, వెలుగు: తెలంగాణ వర్సిటీ రిజిస్ట్రార్ నియామకంలో హైడ్రామా కొనసాగుతోంది. ఓయూకు చెందిన ప్రొఫెసర్ నిర్మలాదేవీ బుధవారం రిజిస్ట్రార్గా బాధ్యతలు తీసుకున్నారు. ఉదయం ఆమె నియామక ఉత్వర్వు లతో టీయూకు రాగా.. మధ్యాహ్నానికి పోస్టింగ్ రద్దు చేస్తూ ఓయూ నుంచి మరో ఆర్డర్ విడుదలైంది. ఈ ఆర్డర్స్పై ఆమె మౌనంగా ఉన్నారు. మీడియా అడిగిన ప్రశ్నలకు రద్దు ఉత్తర్వులు తమకు తెలియదని దాటవేశారు. తాను ఓయూ నుంచి రిలీవ్ అయి, టీయూలో ఛార్జి తీసుకున్నానని, ఇక్కడే కంటిన్యూ అవుతానని స్పష్టం చేశారు. రిజిస్ట్రార్ హోదాలో విద్యావర్థిని నుంచి బాధ్యతలు తీసుకున్నట్టు లేఖపై సంతకం చేశారు. వీసీ వర్సెస్ ఈసీ ఇదిలా ఉండగా.. టీయూలో వీసీ రవీందర్గుప్తా ఈసీ సభ్యుల మధ్య కోల్డ్వార్ నడుస్తోంది. 19న హైదరాబాద్లో ఉన్నత విద్యాశాఖ కమిషనర్ నవీన్మిట్టల్, కార్యదర్శి వాకాటి కరుణ నేతృత్వంలో మీటింగ్ జరిగింది. దీని తర్వాత పలు పరిణామాలు చోటుచేసుకుంటున్నాయి. ఆ మీటింగ్ నిర్ణయం తో ప్రొఫెసర్ యాదగిరి రిజిస్ట్రార్ బాధ్యతలు తీసుకోగా హైకోర్డు స్టే ఆర్డర్తో ఆయన తప్పుకోవాల్సి వచ్చింది. స్టే రద్దు కోసం కోర్టులో ఇప్పటికే కౌంటర్ దాఖాలు చేశారు. రిజిస్ట్రార్ గా పని చేయడానికి విద్యావర్థిని ఆసక్తిగా లేకపోవడంతో ఉత్కంఠకు దారితీసింది.
పై అధికారులు సీరియస్
పై అధికారులకు తెలియకుండా నిర్మలాదేవీ నియామకం జరిగినట్టు తెలుస్తోంది. ఓయూ నుంచి రిలీవ్ ఉత్తర్వులతో ఆమె హుటాహుటినా టీయూకి చేరుకున్నారు. ఈ టైం లోనే పోస్టింగ్ రద్దు ఉత్తర్వులు వెలువడ్డాయి. నిర్మలాదేవీ నియామకాన్ని రద్దు చేస్తూ.. తక్షణమే ఓయూలో రిపోర్టు చేయాలని అక్కడి రిజిస్ట్రార్ లక్ష్మీనారాయణ ఆర్డర్ జారీ చేశారు. సదరు ఆర్డర్ను ఆమెకు, వీసీ రవీందర్ గుప్తాకు వాట్సాప్లో పంపించినట్టు సమాచారం. అయితే అనూహ్య రీతిలో ఆమె అక్కడి బాధ్యతలు స్వీకరించి వెళ్లడం గమనార్హం. ఆర్డర్ రద్దు అయినట్టు తెలిసినా నిర్మలాదేవీ ఛార్జి తీసుకున్నట్టు తెలుస్తోంది. ఓయూ నుంచి ఆమె అధికారికంగా రిలీవ్ అయి కొత్త బాధ్యతల్లో చేరారని వీసీ రవీందర్ చెప్పారు. వీసీ రవీందర్ హయాంలో ఇప్పటికే ఐదుగురు రిజిస్ట్రార్లు మారారు. వీరిలో యాదగిరి ఒక్కరికి మాత్రమే ఈసీ సభ్యుల ఆమోదం ఉంది. తాజాగా వీసీ అధికారాలతో నిర్మలాదేవిని నియమించినా మూడు నెలల వ్యవధిలో దానిని ఈసీ సభ్యులు ఓకే చేయాల్సి ఉంటుంది.
