- తెలంగాణ తల్లి విగ్రహాన్ని సబ్బండ వర్గాల తల్లిగా మారుస్తం
- అందెశ్రీ రాసిన గీతాన్ని రాష్ట్ర గీతంగా చేస్తం
- రాష్ట్రానికి ప్రత్యేక జెండాను రూపొందిస్తామని ప్రకటన
- కాంగ్రెస్ విస్తృత స్థాయి సమావేశంలో ఆమోదం
హైదరాబాద్, వెలుగు: తెలంగాణ ఉద్యమ సమయంలో వాహనాల నంబర్ ప్లేట్పై ‘టీజీ’ అని పెట్టుకునే వాళ్లమని, రాష్ట్రం వచ్చాక చరిత్రను కేసీఆర్ వక్రీకరించి ‘టీఆర్ఎస్’కు అనుకూలంగా ‘టీఎస్’గా మార్చారని పీసీసీ చీఫ్ రేవంత్రెడ్డి దుయ్యబట్టారు. కాంగ్రెస్ అధికారంలోకి రాగానే టీఎస్ను టీజీగా మారుస్తామని ప్రకటించారు. సోమవారం గాంధీభవన్లో రేవంత్ మీడియాతో మాట్లాడారు. అంతకు ముందు జరిగిన కాంగ్రెస్ విస్తృత స్థాయి సమావేశంలో ఈ అంశంతోపాటు మరో మూడింటిపై ప్రతిపాదనలు పెట్టి ఆమోదించినట్లు చెప్పారు. మీడియాకు ఆ వివరాలు వెల్లడించారు.
టీఆర్ఎస్ సృష్టించిన తెలంగాణ తల్లికి సబ్బండ వర్గాల ఆమోదం లేదని, కొత్త ప్రతిరూపం సృష్టించుకోవాల్సిన అవసరం ఉందనే ప్రతిపాదన చేశామన్నారు. ప్రస్తుతం ఉన్న తెలంగాణ తల్లి కేసీఆర్ కుటుంబ సభ్యుల రూపాలను పోలి ఉందని, అది సబ్బండ వర్గాల ప్రతిరూపం కాదని తెలిపారు. ఈ రూపాన్ని కేసీఆర్ బలవంతంగా తెలంగాణపై రుద్దారని, ఇందుకు తెలంగాణ సమాజం ఆమోదం లేదన్నారు. అందుకే కొందరు కళాకారులతో కాంగ్రెస్ ప్రత్యామ్నాయ ప్రతిరూపాన్ని తయారుచేయిస్తున్నదని చెప్పారు. సెప్టెంబర్ 17 వజ్రోత్సవాల సందర్భంగా కొత్త రూపాన్ని గ్రామాల్లో ప్రదర్శించి ప్రజల ఆమోదం పొందుతామన్నారు. అధికారంలోకి వచ్చాక ఆ విగ్రహాన్నే అధికారంగా స్వీకరిస్తామని రేవంత్ తెలిపారు.
అందెశ్రీ రాసిన ‘జయ జయహే తెలంగాణ’ గీతాన్ని ఉద్యమ సమయంలో ఉద్యమ గీతంగా ఆలపించేవాళ్లమని, కానీ అధికారంలోకి వచ్చాక ఆ గీతాన్ని కేసీఆర్ కాలగర్భంలో కలిపేశారని ఆయన మండిపడ్డారు. అందెశ్రీ రాసిన గీతాన్ని కాంగ్రెస్ అధికారంలోకి రాగానే రాష్ట్ర గీతంగా చేస్తామని ప్రకటించారు. తెలంగాణకు ప్రత్యేకమైన జెండా లేదని, జాతీయ జెండాతోపాటు రాష్ట్ర జెండా కూడా రూపొందించుకోవచ్చని అన్నారు. తెలంగాణకు అలాంటి జెండా లేనందున కాంగ్రెస్ అధికారంలోకి రాగానే రాష్ట్ర జెండాను ఆవిష్కరిస్తుందని వివరించారు. ఈ అంశాలను వజ్రోత్సవాల సందర్భంగా ఏడాది పాటు ప్రజల్లోకి తీసుకుపోతామని చెప్పారు.
రాహుల్ యాత్రలో మూడు బహిరంగ సభలు
భారత్ జోడో యాత్రలో భాగంగా మహబూబ్నగర్, శంషాబాద్, జోగిపేటలో బహిరంగ సభలు ఏర్పాటు చేస్తామని రేవంత్ అన్నారు. అక్టోబర్ 24న రాహుల్యాత్ర కృష్ణా బ్రిడ్జి మీదుగా రాష్ట్రంలోకి ప్రవేశిస్తుందని తెలిపారు. 15 రోజుల పాటు 350 కిలోమీటర్లు సాగే యాత్రలో రోజుకో పార్లమెంట్ నియోజకవర్గం నుంచి నేతలు ఆయన వెంట నడుస్తారని
రేవంత్ అన్నారు.
మునుగోడులో డోర్ టు డోర్ క్యాంపెయిన్
మునుగోడు ఉపఎన్నికలో ప్రతి మండలానికి ఒక ముఖ్య నేతను ఇన్చార్జ్గా నియమిస్తామని, వీరికి సహాయకులుగా మరో ఇద్దరు ఉంటారని రేవంత్ చెప్పారు. నియోజక వర్గంలోని 300 బూత్లకు 150 మంది ఇన్చార్జులుగా ఉంటారన్నారు. ఈ ఎన్నికను నాయకులు, కార్యకర్తలంతా ప్రతిష్టాత్మకంగా తీసుకోవాలని రేవంత్ పిలుపునిచ్చారు. సెప్టెంబర్ 18 నుంచి అందరం కలిసి క్షేత్రస్థాయిలో పని చేద్దామని వారికి పిలుపునిచ్చారు. మునుగోడులో రాష్ట్రంలోని 200 మంది నాయకులు తిష్ట వేసి పార్టీ గెలుపు కోసం శ్రమిస్తారని చెప్పారు. సభల వల్ల ఉపయోగం లేదని డోర్ టు డోర్ క్యాంపెయిన్ ఉత్తమమని అన్నారు. విస్తృతస్థాయి సమావేశంలో ఎంపీ ఉత్తమ్కుమార్ రెడ్డి, వర్కింగ్ ప్రెసిడెంట్లు గీతారెడ్డి, మహేష్ కుమార్ గౌడ్, అంజన్కుమార్ యాదవ్, మాజీ మంత్రి షబ్బీర్ అలీ, కేంద్ర మాజీ మంత్రి బలరాం నాయక్ పాల్గొన్నారు.
