కోపం, బాధ, సంతోషం వంటి ఎమోషన్స్ మీద కొన్ని హార్మోన్ల ప్రభావం ఉంటుంది. శరీరంలో హ్యాపీ హార్మోన్లు తక్కువ విడుదలైతే చికాకు, ఒత్తిడి వంటి లక్షణాలు కనిపిస్తాయి అంటోంది క్లినికల్ డైటీషియన్ శృతి భరద్వాజ్. హ్యాపీ హార్మోన్లు... సెరటోనిన్, ఎండార్ఫిన్స్, డోపమైన్, ఆక్సిటోసిన్ అని నాలుగు రకాలు. ఇవి తగినంత రిలీజ్ కావడానికి ఆమె చెప్తున్న డైట్ టిప్స్ ఇవి...
- నీళ్లు బాగా తాగితే శరీరం, మెదడు ఆరోగ్యంగా ఉంటుంది. అంతేకాదు శరీరంలోని టాక్సిన్లు బయటకు పోతాయి. డీహైడ్రేట్ అవరు. ఫలితం.. హ్యాపీ హార్మోన్లు తగినంత తయారవుతాయి.
- ఆకుపచ్చ కూరగాయలు, ఆకుకూరలు, చిక్కుడు జాతి గింజలు, గుడ్లలో ఫోలేట్, విటమిన్ బి–12 ఎక్కువ. ఇవి తింటే ఒత్తిడి, చికాకు, యాంగ్జైటీ వంటివి తగ్గిపోతాయి.
- బాదం, వాల్నట్స్, చియాసీడ్స్, అవిసె గింజలు వంటివి బ్రేక్ఫాస్ట్ లేదా శ్నాక్గా తినడం మంచిది. వీటిలోని ట్రిప్టోఫాన్ అమైనో యాసిడ్ సెరటోనిన్ హార్మోన్ విడుదల కావడంలో సాయపడుతుంది.
- విటమిన్–సి ఫుడ్ తింటే ఆక్సిటోసిన్ తగినంత ఉత్పత్తి అవుతుంది. అందుకని నిమ్మ, ఉసిరి, కమలా పండ్లు, బెర్రీలు డైట్లో ఉండాలి. ఒత్తిడిలో ఉన్నప్పుడు డార్క్ చాక్లెట్లు తింటే రిలీఫ్గా అనిపిస్తుంది. కారణం... ఇందులోని కొకోవా ఎండార్ఫిన్లు విడుదలయ్యేలా చేస్తుంది. దాంతో ఒత్తిడి తగ్గి, మనసు తేలికవుతుంది.
- పులిసిన పిండితో తయారుచేసే ఇడ్లీ, దోశతో పాటు పెరుగు, మజ్జిగలో ప్రొబయాటిక్స్ ఉంటాయి. ఇవి చికాకు, ఆందోళనను తగ్గించడంలో సాయపడతాయి. అంతేకాదు ఆలోచనాశక్తిని పెంచుతాయి.
