- అడ్డుకున్న అధికారులు.. పోలీసులకు ఫిర్యాదు
- 3 జేసీబీలు,12 ట్రాక్టర్లు సీజ్
ఖానాపూర్, వెలుగు: ఖానాపూర్ మండలం బీర్ నంది పంచాయతీ పరిధిలోని ఇప్పమాడ గ్రామ శివారులో కడెం నారాయణరెడ్డి ప్రాజెక్టు బ్యాక్ వాటర్కు సంబంధించిన నల్ల మట్టిని కొందరు గుత్తేదారులు అక్రమంగా తవ్వి తరలిస్తున్నారు. నిబంధనలకు విరుద్ధంగా, ప్రాజెక్టు అధికారుల నుంచి ఎలాంటి అనుమతులు లేకుండా రైతుల పేరుతో నల్ల మట్టి దందా చేస్తూ భారీగా సొమ్ము చేసుకుంటున్నారు. ఈ ఏడాది కడెం ప్రాజెక్టు బ్యాక్ వాటర్ ఎండిపోయింది.
దీంతో అక్కడ సారవంతమైన నల్ల మట్టి లభ్యమవుతోంది. ఇదే అదునుగా బడా వ్యాపారులు రైతుల పేరిట ఈ దందాకు తెరలేపారు. కడెం ప్రాజెక్టు ఎగువ ప్రాంతంలో మూడు జేసీబీ లతో మట్టిని తవ్వుతున్నారు. టిప్పర్లు, ట్రాక్టర్ల ద్వారా రాత్రీపగలు తేడా లేకుండా మట్టిని తరలిస్తున్నారు. ఈ విషయంపై సమాచారం అందుకున్న ప్రాజెక్టు ఏఈఈలు నితిన్ కుమార్, విశాల్, మురళీకృష్ణ అక్కడికి చేరుకొని మట్టి తవ్వకాలను అడ్డుకున్నారు. తవ్వకాలు చేపడుతున్నవారిపై స్థానిక పోలీసులకు ఫిర్యాదు చేశారు. 3 జేసీబీలు,12 ట్రాక్టర్లను సీజ్ చేసినట్లు తెలిపారు.
