అయోడిన్ బిందీ.. రెండు రోజులుగా సోషల్ మీడియాలో చక్కెర్లు కొడుతున్న పేరు. వీటినే ‘లైఫ్ సేవింగ్ డాట్-జీవన్ బిందీ’ అని కూడా పిలుస్తారు. ఈ బొట్టు బిళ్ల పెట్టుకుంటే థైరాయిడ్ దరిచేరదు.. క్యాన్సర్ దూరం పోతుందంటూ మెసేజ్లు వైరల్ అవుతున్నాయి. ఆ ముచ్చట్లలో నిజమెంత? అసలు ఈ బొట్టుబిళ్లకి, ఆరోగ్యానికి సంబంధం ఏంటి?
ఐదో నేషనల్ ఫ్యామిలీ హెల్త్ సర్వే ప్రకారం మనదేశంలో 167 మిలియన్ల మంది ఐడిడి( అయోడిన్ డెఫిషియెన్సీ డిజార్డర్)తో బాధపడుతున్నారు. ఈ లోపం వల్ల 50 లక్షల 7 వేల మంది గాయిటర్, 20 లక్షల మంది మానసిక వైకల్యంతో ఇబ్బంది పడుతున్నారు. మరీ ముఖ్యంగా ఆడవాళ్లలో రోజురోజుకి అయోడిన్ లోపం పెరుగుతోంది. ఆడవాళ్లలో ఈ అయోడిన్ లోపం థైరాయిడ్, బ్రెస్ట్ క్యాన్సర్ , ఫైబ్రాయిడ్స్కి దారి తీస్తోంది. గర్భిణులకి అయోడిన్ లోపం ఉంటే పుట్టబోయే పిల్లల్లో మానసిక ఎదుగుదల సరిగా ఉండదని డాక్టర్లు చెబుతున్నారు. ఈ సమస్యని గుర్తించి 2005వ సంవత్సరంలో సెంట్రల్ గవర్నమెంట్ అయోడైజ్డ్ సాల్ట్ మాత్రమే అమ్మాలని చెప్పింది. కానీ, రూరల్ ఏరియాల్లో ఈ ఉప్పు అంతగా అందుబాటులో లేదు.. పైగా రేటు ఎక్కువ కావడంతో కొందరు కొనలేరు కూడా. అలాంటి వాళ్లకి బెస్ట్ సొల్యూషన్ అయోడిన్ బిందీలు. అయోడిన్తో తయారుచేసిన ఈ బొట్టుబిళ్ల పెట్టుకుంటే చర్మం లోపలకి అయోడిన్ చేరుతుంది. అదెలాగంటే.. అయోడిన్ డెఫిషియెన్సీ టెస్ట్ చేయడానికి అయోడిన్ ప్యాచ్లని భుజాలకి లేదా పొట్టపై అతికిస్తారు. శరీరంలో అయోడిన్ లోపం ఉంటే ఆ ప్యాచ్ల ద్వారా అయోడిన్ శరీరంలోకి పోతుంది. సరిగా అలాగే ఈ అయోడిన్ బిందీలు కూడా పనిచేస్తాయి.
ఎనిమిది గంటలు చాలు
ఆడవాళ్లని అయోడిన్ డిజార్డర్స్ నుంచి బయటపడేయడానికి అలీ షబాజ్ అనే వ్యక్తికి వచ్చిన ఆలోచన ఇది. అలీ మన దేశానికి చెందినవాడే అయినా సింగపూర్లో సెటిల్ అయ్యాడు. సింగపూర్కి చెందిన గ్రే గ్రూప్ కంపెనీలో చీఫ్ క్రియేటివ్ ఆఫీసర్గా పనిచేసేవాడు. మన దేశంలోని ఆడవాళ్లు అయోడిన్ లోపంతో పడుతున్న ఇబ్బందులు చూశాక ఈ బిందీల ఐడియా తట్టింది అలీకి. అంతే నాసిక్లోని నీల్వసంత్ మెడికల్ ఫౌండేషన్తో కలిసి 2015లో ‘లైఫ్ సేవింగ్ ప్రాజెక్ట్’ పేరుతో ఈ బొట్టుబిళ్లలు తయారుచేశాడు. 100 నుంచి 150 మైక్రో గ్రాముల అయోడిన్తో తయారు చేసిన వీటిని ఎనిమిది గంటలు పెట్టుకుంటే చాలు, ఆ రోజుకు కావాల్సిన అయోడిన్ శరీరానికి అందుతుంది.
ధర చాలా తక్కువ
ప్యాచ్లా ఉండే ఈ అయోడిన్ బొట్టు బిళ్లలు కెమికల్ ఫ్రీ. వీటివల్ల ఎలాంటి సైడ్ ఎఫెక్ట్స్ ఉండవు. పైగా ధర కూడా చాలా తక్కువ. 30 బిందీలున్న ఈ ప్యాకెట్ రెండు రూపాయలే. అయోడిన్ సప్లిమెంట్స్ కొనే స్థోమత లేనివాళ్లకి ఇవి బెస్ట్ ఆప్షన్. అన్ని రకాలు రంగుల్లోనూ ఈ బొట్టుబిళ్లలు వస్తున్నాయి. ఇప్పటికే మహారాష్ట్రలోని కొన్ని రూరల్ ఏరియాల్లోని ఆడవాళ్లపై ఈ బిందీలని టెస్ట్ చేశారు. భవిష్యత్లో వీటిని దేశవ్యాప్తంగా అందరికీ అందుబాటులోకి తెచ్చే ఆలోచనలో ఉంది గ్రే గ్రూప్ కంపెనీ. ఎవరైనా మా ఫార్ములాతో అయోడిన్ బొట్టుబిళ్లల్ని తయారుచేయడానికి ముందుకొచ్చినా మేం సిద్ధమే అంటోంది ఈ కంపెనీ.