కొచ్చి: కేరళలో ఐదేండ్ల చిన్నారిపై అత్యాచారానికి పాల్పడి, దారుణంగా చంపేసిన కేసులో దోషికి మరణ శిక్ష పడింది. బాలిక హత్య జరిగిన 110 రోజుల తర్వాత పోక్సో ప్రత్యేక కోర్టు మంగళవారం తుదితీర్పును వెల్లడించింది. బీహార్కు చెందిన కూలి పనిచేసుకునే అశ్వక్ ఆలంను ఉరితీయాలని కోర్టు ఉత్తర్వుల్లో పేర్కొంది. అయితే, ఈ తీర్పును హైకోర్టు ధృవీకరించిన తర్వాత అమలవుతుందని పబ్లిక్ ప్రాసిక్యూటర్ తెలిపారు.
జులై 28న చాక్లెట్ కొనిస్తానని చెప్పి అలువా ప్రాంతంలో ఉండే ఐదేండ్ల చిన్నారిని తీసుకెళ్లిన అశ్వక్.. ఆమెపై అత్యాచారానికి పాల్పడి, ఆపై గొంతునులిమి చంపేశాడు. అనంతరం డెడ్బాడీని గోనె సంచీలో కట్టి చెత్తకుప్పలో పడేశాడు. ఈ దారుణం జరిగిన రెండు రోజుల్లోనే పోలీసులు బాధితురాలి మృతదేహాన్ని, నిందితుడిని కనిపెట్టారు. ఈ ఘటనపై రాష్ట్రవ్యాప్తంగా ఆందోళనలు మిన్నంటాయి. కాగా, కోర్టు తాజా తీర్పుపై సీఎం పినరయి విజయన్ స్పందించారు. బాలల దినోత్సవంనాడు ఇచ్చిన తీర్పు.. పిల్లలపై దారుణాలకు పాల్పడేవారికి హెచ్చరిక కావాలన్నారు. ఆ బాలిక తల్లిదండ్రులకు ప్రభుత్వం మాత్రం అన్ని విధాలా అండగా ఉంటుందని ఆయన హామీ ఇచ్చారు.
