స్కూల్లగానీ, కాలేజీలగానీ సక్కగ సదవని స్టూడెంట్లు పక్కోళ్ల దాంట్ల చూసి కాపీ కొడుతుంటరు. కాపీ, కొట్టకుండా ఇన్విజిలేటర్లు కాలు గాలిన పిల్లి లాగా అటు ఇటు తిరుగుతుంటరు. అయినా, ఇన్విజిలేటర్ అట్ల పోతడో లేదో కాపీ కొట్టేస్తుంటరు పిలగాళ్లు. ఇగో సూడురి పిల్లల తలకాయలకు కాటన్ పెట్టెలు పెట్టిన్రు లే. ఎందుకనుకుంటున్నరు? పిల్లలు పరీక్ష కాపీ కొట్టకుండా ఉండేటందుకే. మెక్సికోలోని ట్లాష్కాలా అనే రాష్ట్రంలోని బ్యాచిలర్స్ 01 ఎల్ సబినాల్ స్కూల్లో జరిగిందీ చిత్రం. అగో, మా పిల్లల తలకాయలకు గిట్ల అట్టపెట్టెలు పెడతరా అంటూ తల్లిదండ్రులు, ఈ ఐడియా చేసిన స్కూల్ టీచర్పై ఒంటి కాలిమీద లేచిర్రట. ఆ టీచర్ స్కూల్ల ఉండనే ఉండొద్దంటూ ధర్నాకు దిగిర్రట. ఎథిక్స్ అండ్ వాల్యూస్ అనే సబ్జెక్ట్ చెప్పే లూయిస్ జువారెజ్ టెక్సిస్ అనే టీచర్ ఈ పని చేసిండట. విలువలు చెప్పే టీచర్ కదా.. ఆ మాత్రం చేస్తే ఏం కాదులె అనుకున్నడో ఏమో ఇట్ల తలకాయలకు అట్టపెట్టెలు పెట్టించిండు. అది అట్లుంటే బ్యాంకాక్లోని కేసెట్సార్ట్ అనే యూనివర్సిటోళ్లు స్టూడెంట్ల తలలకు అడ్డంగా పేపర్ హ్యాట్లు తగిలించిన్రు. వాటికి స్పెషల్ బ్లింకర్లు అని పేరు పెట్టిన్రు. ఈ సెటప్ కూడా పిల్లలు పరీక్షలో కాపీ కొట్టకుండా ఉండేందుకేనట.
