- జూన్లో 18.78 బిలియన్ డాలర్లు
భారీగా తగ్గిన దిగుమతులు
న్యూఢిల్లీ : ఈ ఏడాది జూన్ నెలలో భారతదేశ ఎగుమతుల విలువ దాదాపు స్థిరంగా 35.14 బిలియన్ డాలర్లుగా నమోదయింది. గత సంవత్సరం ఇదే నెలలో 35.16 బిలియన్ డాలర్ల విలువైన ఎగుమతులు జరిగాయి. దిగుమతులు గణనీయంగా తగ్గడంతో దేశ వాణిజ్య లోటు నాలుగు నెలల కనిష్టానికి చేరుకుంది. ఈ ఏడాది మే నెలలో 21.88 బిలియన్ డాలర్లుగా ఉన్న వాణిజ్య లోటు జూన్లో 18.78 బిలియన్లకు తగ్గింది.
ఈ ఏడాది జూన్లో మనదేశ ఎగుమతుల విలువ 35.14 బిలియన్ డాలర్లు కాగా, అంతకుముందు సంవత్సరం ఇదే నెలలో 35.16 బిలియన్ డాలర్లుగా ఉంది. ఎగుమతుల వృద్ధి స్థిరంగా ఉంది. ఈసారి జూన్లో దిగుమతులు 3.71 శాతం తగ్గి 53.92 బిలియన్లకు చేరుకున్నాయి. గత ఏడాది ఇదే నెలలో దిగుమతుల విలువ 56 బిలియన్ డాలర్లుగా నమోదయింది. దిగుమతులలో ఈ తగ్గుదల వాణిజ్య లోటు తగ్గడానికి ప్రధాన కారణమని కేంద్ర ప్రభుత్వం తెలిపింది.
ఎగుమతులు స్థిరంగా ఉండగా, దిగుమతులు తగ్గడంతో జూన్లో వాణిజ్య లోటు 18.78 బిలియన్లకు తగ్గింది. ఇది గత నాలుగు నెలల్లో నమోదైన కనిష్ట వాణిజ్య లోటు. మే నెలలో 21.88 బిలియన్ డాలర్లుగా ఉన్న లోటుతో పోలిస్తే ఇది మెరుగైన పరిస్థితి. సేవల ఎగుమతుల విలువ సుమారు రూ. 2.82 లక్షల కోట్లుగానూ, దిగుమతులు రూ. 1.5 లక్షల కోట్లుగానూ ఉంది.
ప్రపంచవ్యాప్తంగా కొనసాగుతున్న వాణిజ్య చర్చలు, ఆర్థిక అనిశ్చితులు ఉన్నప్పటికీ, భారతదేశం ఎగుమతులు స్థిరంగా ఉండటం సానుకూలమని ఎక్స్పర్టులు చెబుతున్నారు. దిగుమతుల్లో తగ్గుదల దేశీయ డిమాండ్ లేదా అంతర్జాతీయ కమోడిటీ ధరల తగ్గుదలను సూచిస్తుందని, వాణిజ్య లోటు తగ్గడం దేశ ఆర్థిక స్థిరత్వానికి మంచిదని అంటున్నారు.
