చెట్టు నుంచి బుల్లెట్స్ రావడమేంటి? అని ఆశ్చర్యపోతున్నారా? కానీ అది నిజమే. అమెజాన్ రెయిన్ ఫారెస్ట్‌‌‌‌లో పెరిగే ‘శాండ్‌‌‌‌బాక్స్’ అనే చెట్టు విత్తనాలు బాంబుల్లా పేలతాయి. వాటి విత్తనాలు నేలపై కాకుండా గాలిలో బుల్లెట్లలా దూసుకువస్తాయి. వంద అడుగుల ఎత్తు ఉండే ఈ చెట్టుకి దగ్గర్లో ఎవరైనా ఉంటే ఆ బుల్లెట్ల ధాటికి చనిపోవడం ఖాయం. అందుకే ఈ చెట్టుని ‘డైనమైట్ ట్రీ’ అని పిలుస్తారు. శాండ్‌‌‌‌బాక్స్ ట్రీ ప్రపంచంలోనే ప్రమాదకరమైన, భయంకరమైన చెట్టు. ఇది మనుషులను సునాయాసంగా చంపగలదు.
ఈ చెట్టు కాండానికి ముళ్ల రూపంలో మొగ్గలు వస్తాయి. ఈ ముళ్ల నుంచి కాయలు కాస్తాయి. ఈ కాయలు చూడ్డానికి గుమ్మడికాయల్లా ఉంటాయి. కానీ వాటి నుంచి వచ్చే విత్తనాలు మాత్రం అత్యంత ప్రమాదకరం. చెట్టు పూతకు వచ్చినప్పుడు ఈ విత్తనాలు నేలమీద పడకుండా చెట్టుకు అన్నివైపులా సమాంతరంగా దూసుకెళ్తాయి. ఎంతో విషపూరితమైన ఈ విత్తనాలు మనుషులకు తగిలితే ప్రాణాలు పోయే ప్రమాదం ఉంది. అంతేకాదు ఈ చెట్టుని ఎక్కడం కూడా దాదాపు అసాధ్యం. కోతుల్లాంటి జంతువులు కూడా ఈ చెట్టుని ఎక్కలేవు. దీన్ని ‘డెడ్లియెస్ట్ ట్రీ’, ‘ఫ్రూట్ బాంబ్’ ట్రీ అని కూడా అంటారు.
