ముంబై: ఇండియన్ నేవీలో కల్వరీ క్లాస్ సబ్మెరైన్ ‘‘ఐఎన్ఎస్ వాగీర్’’ చేరింది. దీంతో నావికాదళం మరింత పటిష్టమైంది. కల్వరీ క్లాస్లో ఐదో సబ్మెరైన్గా వాగీర్ సేవలు అందించనుంది. మజ్గావ్ డాక్ షిప్ యార్డ్ లిమిటెడ్ కంపెనీ దీన్ని ముంబైలో తయారు చేసింది. ఫ్రాన్స్ టెక్నాలజీతో నిర్మించిన ఈ సబ్ మెరైన్ ఇండియన్ నేవీ చీఫ్ అడ్మిరల్ ఆర్.హరికుమార్ సమక్షంలో సోమవారం డ్యూటీ ఎక్కింది. ఈ సందర్భంగా హరికుమార్ మాట్లాడారు. వాగీర్ రాకతో సముద్ర జలాల్లో భద్రత మరింత పెరిగిందన్నారు. విపత్కర పరిస్థితుల్లో శత్రువులను దెబ్బతీసేందుకు, ఇంటెలిజెన్స్, సర్వేలైన్స్, నిఘా కోసం ఎంతో ఉపయోగపడుతుందని తెలిపారు. ప్రాజెక్ట్ 75 కింద దీన్ని నిర్మించామని, దేశ ప్రయోజనాలను కాపాడుతుందని అభిప్రాయపడ్డారు. వాగీర్ అంటే సొర చేప అని, నిశ్శబ్దంగా, భయం లేకుండా పని ముగించడం దీని ప్రత్యేకత అని వివరించారు. అత్యాధునిక టెక్నాలజీ, ఆయుధాలు కలిగి ఉంటుందన్నారు.
సౌండ్ అబ్సార్ప్షన్ టెక్నిక్తో సేవలు
వాగీర్ సీ ట్రయల్స్ 2022 ఫిబ్రవరి నుంచి ప్రారంభించామని, డిసెంబర్ 20న నేవీ చేతికి అందించామని ఎండీఎల్ చైర్మన్, ఎండీ నారాయణ్ ప్రసాద్ అన్నారు. ప్రపంచ వ్యాప్తంగా రాజకీయాలు హీటెక్కాయని, ఈ టైంలో వాగీర్ ఇండియన్ నేవీలో చేరడం మరింత వేడి పుట్టిస్తుందన్నారు. శత్రువుల రాడార్కు చిక్కకుండా సౌండ్ అబ్సార్ప్షన్ టెక్నిక్తో ఈ సబ్మెరైన్ పని చేస్తుందన్నారు.
సబ్మెరైన్ ప్రత్యేకతలు..
- అతిపెద్ద నౌకలను ధ్వంసం చేసే వైర్-గైడెడ్ టార్పెడోలు ఇందులో ఉన్నాయి.
- వాగీర్ నుంచి సబ్ సర్ఫేస్ టూ సర్ఫేస్ మిసైల్స్ ప్రయోగించవచ్చు.
- పవర్ఫుల్ డీజిల్ ఇంజిన్ను అమర్చారు. ఇవి స్టెల్త్ మిషన్ కోసం బ్యాటరీలను తక్కువ టైంలో ఫుల్ చార్జ్ చేస్తాయి.
- సెల్ఫ్ ప్రొటెక్షన్ కోసం అత్యాధునిక టార్పెడో డికాయ్ సిస్టమ్‌ ఉంది.
- సముద్రం మధ్యలో, ఒడ్డుకు దగ్గర్లో కూడా వాగీర్ను మోహరించవచ్చు.
- హైడ్రో డైనమిక్ రూపానికి అనుకూలంగా దీన్ని తయారు చేశారు.
- యాంటీ సర్ఫేస్ వార్, యాంటీ సబ్ మెరైన్ వార్, మైన్స్ పెట్టడం, నిఘా పెట్టడం వాగీర్ ప్రత్యేకత.
- నీటి లోపల గంటకు 40 కి.మీ. నీటిపైన గంటకు 20 కి.మీ స్పీడ్తో వెళ్తుంది.
- 221 అడుగుల పొడవు, 21 మీటర్ల ఎత్తు వరకు ఉంటుంది.
