సోమవారం(ఏప్రిల్ 8) కోల్కతా నైట్ రైడ‌ర్స్‌‌తో జరిగిన మ్యాచ్ లో చెన్నై సూపర్ కింగ్స్ బ్యాటర్ మహేంద్ర సింగ్ ధోని ఐపీఎల్ చరిత్రలో ఆల్‌టైమ్ రికార్డు నెలకొల్పాడు. విజయానికి చివరి 19 బంతుల్లో 3 పరుగులు కావాల్సిన సమయంలో క్రీజులోకి వచ్చిన ధోని కాసేపు అభిమానులను ఆనందపరిచాడు. విన్నింగ్ షాట్ కొట్టకుండా.. ఆచి తూచి ఆడుతూ అభిమానులను సంతోషపరిచాడు. మూడు బంతులు ఎదుర్కొని నాటౌట్ గా నిలిచాడు. ఈ ప్రదర్శనే అతన్ని ఐపిఎల్‌లో ఓ ఆల్‌టైమ్ రికార్డుకు చేరువ చేసింది.
అభిమానుల సంతోషం కోసమే..!
నిజానికి ధోని క్రీజులోకి వచ్చే సమయానికే చెన్నై విజయానికి చేరువ కావడంతో అతనికి ఎక్కువ సేపు బ్యాటింగ్ చేసే అవకాశం రాలేదు. విజయానికి 3 పరుగుల దూరంలో శివమ్ దూబే(28) ఔట్ అవ్వడంతో.. అభిమానుల సంతోషం కోసం క్రీజులోకి వచ్చాడు. 3 బంతుల్లో ఒక పరుగు చేసి అజేయంగా నిలిచాడు. దీంతో ఐపీఎల్ చరిత్రలో చేజింగ్ సమయాల్లో అత్యధిక సార్లు(28) నాటౌట్‌గా నిలిచిన బ్యాటర్‌గా ధోని ఆల్‌టైమ్ రికార్డు నెలకొల్పాడు. గతంలో ఈ రికార్డు రవీంద్ర జడేజా(27 సార్లు) పేరిట ఉండేది. ఆ రికార్డును ధోని అధిగమించాడు.
విజయవంతమైన ఛేజ్‌లలో ఎక్కువ సార్లు నాటౌట్‌గా నిలిచిన ఆటగాళ్లు
- ఎంఎస్ ధోని: 28
- రవీంద్ర జడేజా: 27
- దినేష్ కార్తీక్: 23
- యూసుఫ్ పఠాన్: 22
- డేవిడ్ మిల్లర్: 22
ఇక మ్యాచ్ విషయానికొస్తే.. మొదట బ్యాటింగ్ చేసిన కోల్కతా నిర్ణీత ఓవర్లలో 137 పరుగులు చేయగా.. చెన్నై బ్యాటర్లు ఆ లక్ష్యాన్ని ఆడుతూ పాడుతూ చేధించారు. 17.4 ఓవర్లలో 3 వికెట్లు కోల్పోయి మ్యాచ్ ముగించారు.
