లెజెండరీ నటుడు కమల్ హాసన్, దర్శక దిగ్గజం శంకర్ కాంబినేషన్‌లో వచ్చిన 'భారతీయుడు 2' మూవీ గత ఏడాది రిలీజైన విషయం తెలిసిందే. 1996లో వచ్చిన సూపర్ హిట్ మూవీ భారతీయుడుకు సీక్వెల్గా వచ్చిన ఈ మూవీ భారీ అంచనాల మధ్య రిలీజై.. డిజాస్టర్ గా నిలిచింది. అయితే, ఈ సినిమా ముగింపులో 'భారతీయుడు 3' ట్రైలర్ చూపించి, అభిమానులకు మరింత ఉత్సాహాన్ని అందించారు. పార్ట్ 2 డిజాస్టర్ అయినప్పటికీ, పార్ట్ 3 పై అంచనాలు మాత్రం భారీగానే ఉన్నాయి. కానీ, గత కొంత కాలంగా ఈ ప్రాజెక్టుపై అనిశ్చితి నెలకొనడంతో అభిమానులలో ఆందోళన మొదలైంది.
ఈ సినిమా మొదట ఒక భాగంగా మాత్రమే ప్లాన్ చేశారు దర్శకుడు శంకర్. కానీ, కథ నిడివి ఎక్కువ కావడంతో దర్శకుడు శంకర్ దీనిని రెండు భాగాలుగా విడుదల చేయాలని నిర్ణయించారు. దీనిలో భాగంగానే, పార్ట్ 2 చివరిలో పార్ట్ 3 ట్రైలర్ చూపించి, ప్రేక్షకులను థియేటర్ల నుంచి ఆకర్షించారు. ట్రైలర్ అద్భుతంగా ఉన్నప్పటికీ, పార్ట్ 3 విడుదల అవుతుందో లేదో అనే సందేహాలు మొదలయ్యాయి.
మొదట, పార్ట్ 3 థియేటర్లలో కాకుండా నేరుగా ఓటీటీలో విడుదల అవుతుందని ప్రచారం జరిగింది. కానీ దర్శకుడు శంకర్ ఈ వార్తలను ఖండించి, సినిమా థియేటర్లలోనే విడుదల అవుతుందని స్పష్టం చేశారు. ఆ తర్వాత, పార్ట్ 3 షూటింగ్ పూర్తిగా రద్దయిందని, నిర్మాణ సంస్థ లైకా ప్రొడక్షన్స్ ప్రాజెక్టు నుంచి తప్పుకుందని ఊహాగానాలు వినిపించాయి. ఈ వార్తలు కమల్ హాసన్ అభిమానులను తీవ్ర నిరాశకు గురిచేశాయి.
ఆ తర్వాత, లైకా ప్రొడక్షన్స్ మళ్లీ 'భారతీయుడు 3'పై పనిచేయడం ప్రారంభిస్తుందని, రెడ్ జెయింట్ ప్రొడక్షన్స్ భాగస్వామిగా చేరుతుందని వార్తలు వచ్చాయి. కానీ, తాజాగా అందుతున్న సమాచారం ప్రకారం, లైకా , రెడ్ జెయింట్ సంస్థల మధ్య కుదిరిన ఒప్పందం రద్దయినట్లు తెలుస్తోంది. దీంతో, 'భారతీయుడు 3' ప్రాజెక్టుకు పూర్తిగా బ్రేక్ పడిందని, ఈ సినిమా ఇక వచ్చే అవకాశం లేదని టాలీవుడ్, కోలీవుడ్ సర్కిల్స్‌లో గుసగుసలు వినిపిస్తున్నాయి. ఈ విషయమై అధికారిక ప్రకటన వెలువడే వరకు ఏదీ చెప్పలేం. కానీ ప్రస్తుతానికి, కమల్ హాసన్ ఫ్యాన్స్‌కి ఇది ఒక పెద్ద షాక్ అనే చెప్పాలి. ఈ మూవీ గురించి అధికారిక ప్రకటన కోసం అభిమానులు ఎంతో ఆసక్తిగా ఎదురుచూస్తున్నారు.
