హైదరాబాద్, వెలుగు : జనవరి 12న భద్రాద్రి కొత్త గూడెం జిల్లా పాల్వంచలో నిర్వహించిన సీఎం కేసీఆర్బహిరంగ సభ ఖర్చుల వసూలు కోసం వివిధ డిపార్ట్మెంట్లకు టార్గెట్ పెట్టినట్లు తెలుస్తోంది. కలెక్టరేట్ ప్రారంభోత్సవం తర్వాత సుమారు 10వేల మందితో సభ ఏర్పాటు చేశారు. హైకమాండ్ ఆదేశాల మేరకు ఈ సభ నిర్వహణ బాధ్యతలు స్థానిక ఎమ్మెల్యే వనమా వెంకటేశ్వర్రావు చూసుకున్నారు. ఇటీవల ఈ లెక్కలు సరిచూసే క్రమంలో ఎమ్మెల్యే ఇంట్లో జరిగిన సంభాషణకు సంబంధించిన ఆడియో ఒకటి మంగళవారం సోషల్ మీడియాలో వైరల్అయింది. సభ కోసం రూ.70 లక్షల దాకా ఎమ్మెల్యే ఖర్చు చేశారు. పెద్దమొత్తం కావడంతో పలువురు లీడర్లతో పాటు కొత్తగూడెంలోని ఇరిగేషన్, సబ్రిజిస్ట్రార్, పంచాయతీరాజ్ తదితర శాఖలకు టార్గెట్లు పెట్టినట్లు తెలిసింది. ఇందులో సబ్రిజిస్ట్రార్ను రూ.5 లక్షలు పంపుమని చెప్పగా, ఆయన మొదట ఒప్పుకోలేదు. వనమా కొడుకు రాఘవ సంగతి తెలిసిన ఓ రియల్టర్ నచ్చజెప్పడంతో రూ.3లక్షలు తెచ్చి ఎమ్మెల్యే పీఏకు అప్పగించాడు.
ఇటీవల ఎమ్మెల్యే ఇంట్లో ఈ లెక్కలు చేస్తుండగా విషయం గుర్తించి.. సబ్రిజిస్ట్రార్ నుంచి కేవలం రూ.3లక్షలు ఎలా తీసుకుంటావని పీఏను ఎమ్మెల్యే వెంకటేశ్వర్రావు సతీమణి, ఆయన కొడుకు రాఘవ నిలదీశారు. తాము మీటింగ్కు రూ.70 లక్షల దాకా ఖర్చు చేశామని, అలాంటిది సబ్రిజిస్ట్రార్ నుంచి కేవలం రూ.3 లక్షలు ఎలా తీసుకుంటావని పీఏను ప్రశ్నించారు. అంత తక్కువ మొత్తంతీసుకొని బద్నాం అయ్యేకంటే తీసుకోకున్నా బాగుండేదంటూ లొల్లిపెట్టారు. ఇది కాస్తా ఎవరో రికార్డు చేయడంతో ఇప్పుడు వైరల్ అయ్యింది. ఇప్పటికే పలు వివాదాల్లో ఉన్న వనమా రాఘవ, తాజాగా మరో వివాదంలో చిక్కుకోవడంపై స్థానికంగా చర్చ జరుగుతోంది.
