రాజకీయాల్లో పార్టీ గుర్తింపుతో ఎదిగే నాయకులే ఎక్కువగా కనిపిస్తుంటారు. కానీ మరికొందరు నాయకుల క్యారెక్టరే ఆయా పార్టీలకు మరింత వన్నె తెస్తుంది. సింప్లిసిటి, ఫేర్ పాలిటిక్స్, నిక్కచ్చితనం, సామాన్య జీవితం, మెరుగైన ప్రజాసంబంధాలు కలిగిన నాయకుడు ఏ పార్టీలో ఉన్నా ఆ పార్టీకి ప్రయోజనమే. రాజకీయాల్లో గెలుపోటములు సహజం. ఓడిపోయిన ప్రతినాయకుడికి జనాదరణ లేదనుకుంటే పొరపాటు. 2023 అసెంబ్లీ ఎన్నికల్లో, 2024 లోక్సభ ఎన్నికల్లో జీవన్ రెడ్డి ఓడిపోవచ్చుగాక, ప్రజల్లో ఆయన వ్యక్తిత్వం పట్ల గౌరవం ఓడిపోలేదు. అందుకే జగిత్యాల నుంచి గెలిచిన బీఆర్ఎస్ ఎమ్మెల్యే కాంగ్రెస్ పార్టీలో చేరడాన్ని అంత ధైర్యంగా, తీవ్రంగా వ్యతిరేకించగలిగారు. ఇలాంటి రాజకీయ నాయకులు నిజంగా చాలా అరుదుగా కనిపిస్తుంటారు. అందులో జీవన్ రెడ్డి ఒకరని కచ్చితంగా చెప్పొచ్చు.
జగిత్యాల ఆయన రాజకీయ రణ క్షేత్రం. 1981లో ఆయన రాజకీయ జీవితం పంచాయతీ సమితి అధ్యక్షుడిగా మొదలైంది. తదుపరి 6 సార్లు ఎమ్మెల్యేగా, మూడుసార్లు మంత్రిగా పనిచేశారు. ఆయన రాజకీయ జీవితం కాంగ్రెస్ పార్టీలోనే దశాబ్దాల పాటు సాగింది. నిన్న ఆయన కాంగ్రెస్ పార్టీకి రాజీనామా చేయడం తెలంగాణ రాజకీయాలకు ఒక కుదుపు లాంటిదే! నిజానికి ఆయనకు కాంగ్రెస్ పార్టీ అనేక అవకాశాలిచ్చిందనడంలో ఎంత నిజముందో, ఆయన ఫెయిర్ పొలిటికల్ కెరీర్ కూడా కాంగ్రెస్ పార్టీకి అంతే ఉపయోగపడిందని చెప్పాలి. అలాంటి క్రెడిబుల్ లీడర్ జీవన్ రెడ్డి కాంగ్రెస్ పార్టీ కి రాజీనామా చేయడమే.. ఇపుడు ఆయనను తెలంగాణ రాజకీయాల్లో వార్తల్లో వ్యక్తిగా నిలబెట్టింది.
కాంగ్రెస్కు అరుదైన క్రెడిబుల్ నాయకుడు
నిజానికి జీవన్రెడ్డి కాంగ్రెస్ పార్టీ కష్టాల్లో ఉన్నపుడు (2019) ఆయన గ్రాడ్యుయేట్ ఎమ్మెల్సీగా గెలిచి. అప్పటి కేసీఆర్ ప్రభుత్వాన్ని ఖంగు తినిపించాడు. గ్రాడ్యుయేట్ ఎమ్మెల్సీగా జీవన్ రెడ్డి గెలుపు అప్పట్లో కాంగ్రెస్ పార్టీకి గొప్ప బూస్ట్ ఇచ్చింది. తెలంగాణ ఏర్పాటుకు మద్దతుగా నిలిచిన కాంగ్రెస్ పార్టీ నేతల్లో జీవన్రెడ్డి కూడా ఒకరు. అంతేకాదు, తెలంగాణ వచ్చాక కేసీఆర్ ప్రభుత్వ వైఫల్యాలపై, అవినీతిపై నిక్కచ్చిగా నిలదీసిన నాయకుడాయన. తెలంగాణ ఇచ్చిన కాంగ్రెస్ పార్టీని అధికారంలోకి తేవాలనే లక్ష్యం ఆయన మాట్లాడే మాటల్లో అడుగడుగునా కనపడేది. ఆయన జగిత్యాల నాయకుడే అయినా, మోస్ట్ క్రెడిబుల్ లీడర్గా ఆయనకు తెలంగాణ వ్యాప్తంగా పేరుంది. ఆయనకు ఏఐసీసీ అప్పట్లో పీసీసీ అధ్యక్ష పదవి ఆఫర్ కూడా ఇచ్చిందని విన్నాం. కానీ ఆయనే సున్నితంగా వద్దన్నట్లు కూడా విన్నాం. పార్టీ గెలుపు ముఖ్యం తప్ప పదవి ముఖ్యం కాదనే భావన ఆయన పట్ల ఇవాళ కాంగ్రెస్ క్యాడర్లోనూ గౌరవాన్ని తెచ్చిపెట్టిందని చెప్పొచ్చు.
పార్టీలో గౌరవం?
కాంగ్రెస్ పార్టీ ప్రభుత్వం ఏర్పడ్డాక ఆయనకు మంత్రి పదవి దక్కుతుందనే వార్తలు విన్నాం. కానీ, జగిత్యాలలో ఆయన ఓడిపోవడం వల్ల ఆ అవకాశం వచ్చి ఉండకపోవచ్చు. ఓడినా, గెలిచినా, కాంగ్రెస్ పార్టీకి కావల్సిన నేతగా ఆయనకు దక్కాల్సినంత గౌరవం లభించలేదనే అభిప్రాయం ఉండటం చిన్నపాటి కారణమే అనుకున్నా, ఆయనపై గెలిచిన బీఆర్ఎస్ ఎమ్మెల్యే కాంగ్రెస్ పార్టీలో చేరడం జీవన్ రెడ్డికి ఒక పొలిటికల్ ఛాలెంజ్గా మారడమే ఆయన రాజీనామాకు ప్రధాన కారణమని చెప్పాలి.
ప్రజల్లో సానుభూతి
జీవన్ రెడ్డి పొలిటికల్ స్టేటస్ లెక్కలోకి తీసుకొని చూస్తే మాత్రం.. జగిత్యాల బీఆర్ఎస్ ఎమ్మెల్యే కాంగ్రెస్లో చేరడాన్ని ఆయన వ్యతిరేకించడం తప్పని ఎవరూ అనుకోవడం లేదు. జీవన్ రెడ్డి వాదనకు ప్రజల్లోనూ సానుభూతి ఉంది. కాబట్టే, జీవన్ రెడ్డిని బుజ్జగించడానికి కాంగ్రెస్ నేతలు, మంత్రులు చివరిరోజుదాకా ప్రయత్నించారు, విఫలమైనారు. ఆయన ఇపుడు ఏ పార్టీలో చేరతాడనే చర్చ అంతటా జరుగుతోంది. బీఆర్ఎస్లో చేరే అవకాశాలు ఉన్నాయనే అభిప్రాయం విస్తృతంగా వినిపిస్తోంది. ఆయన బీజేపీలో చేరతారనే వాదన కూడా అంతే బలంగా వినబడుతోంది.
కుటుంబ పార్టీలో చేరితే..
ఆయన రాజీనామాకు ఎంత ప్రాధాన్యం లభించిందో, ఇపుడాయన ఏ పార్టీలో చేరతారనేది కూడా అంతే ప్రాధాన్యాన్ని సంతరించుకుంది. జీవన్ రెడ్డి రాజకీయ పోరాటమంతా బీఆర్ఎస్కు వ్యతిరేకంగానే కొనసాగింది. జీవన్రెడ్డి తెలంగాణ వ్యాప్తంగా ఒక గుర్తింపు తెచ్చుకున్న నేతగా, బీఆర్ఎస్ లాంటి ఒక కుటుంబ పార్టీలో ఇమడగలరా? ఒకవేళ బీఆర్ఎస్లో చేరినా చేయగలిగేదేమీ లేకపోయినా.. ఆయన పొలిటికల్ కెరీర్కు బీఆర్ఎస్ సూటబుల్ పార్టీ కాదనే అభిప్రాయం మాత్రం సర్వత్రా వినిపిస్తోంది. ఫలితంగా ఆయన బీజేపీలో చేరే అవకాశాలు అనివార్యం అవుతాయేమో చెప్పలేం! కొంతకాలం ఆయన రాజకీయ పరిస్థితులను పరిశీలించే అవకాశమూ లేకపోలేదు. ఏది ఏమైనా జీవన్రెడ్డి రాజీనామా ఎటు మలుపు తిరుగుతుందనే కన్నా.. తెలంగాణ రాజకీయాలను అది కొంతైనా ప్రభావితం చేయబోతుందని మాత్రం చెప్పొచ్చు.
- కల్లూరి
ఓపెన్ పేజీకి వ్యాసాలు, లెటర్లు పంపాల్సిన మెయిల్ ఐడీ
openpage@v6velugu.com
రచయితలు ‘వెలుగు’ కు మాత్రమే పంపుతున్నామని
హామీ తప్పనిసరి రాయాలి. స్వీయ రచన అయి ఉండాలి.
