- జూబ్లీహిల్స్ గ్యాంగ్రేప్ కేసుపై పోలీసుల విచారణలో మైనర్ల తీరిది
- ముగ్గురి కస్టడీ పూర్తి.. ఇవాళ మిగతా ఇద్దరిదీ కూడా
- 17 మంది సాక్షుల్లో 8 మందిని విచారించిన పోలీసులు
- కార్ల ఓనర్లు, నిందితుల పేరెంట్స్పై కేసులు
హైదరాబాద్, వెలుగు: కేసులు, శిక్షల గురించి భయమే లేదు.. తప్పు చేశామన్న బాధే లేదు.. పైగా ఎంజాయ్మెంట్ కోసమే బాలికను ట్రాప్ చేశామన్న సమాధానం. ఇద్దరమ్మాయిలను ట్రాప్ చేసినా.. ఒక్కరినే కార్లో తీసుకెళ్లామన్న నిర్లక్ష్యపు ఆన్సర్.. రొటీన్ జాయ్లో భాగంగానే బాలికపై విచక్షణారహితంగా ప్రవర్తించామన్న సమాధానం.. ఇదీ ఐదు రోజుల పోలీస్ కస్టడీలో మైనర్ నిందితుల తీరు. పోలీస్ స్టేషన్లో వాళ్ల ప్రవర్తనను చూసి పోలీసులే విస్మయానికి గురైనట్టు తెలుస్తోంది. విచారణ చేస్తున్నంతసేపూ వాళ్లలో పశ్చాత్తాపమే కనిపించలేదని విచారణ చేస్తున్న ఓ అధికారి చెప్పారు. ఎంజాయ్మెంట్ మోజులోనే అమ్మాయిపై ఘాతుకానికి పాల్పడినట్టు మైనర్ నిందితులు చెప్పారన్నారు. పోలీస్ కస్టడీలో భాగంగా మంగళవారం కూడా మైనర్లను పోలీసులు విచారించారు. మంగళవారంతో ముగ్గురి కస్టడీ పూర్తికాగా.. ఎమ్మెల్యే కొడుకు సహా ఇంకో మైనర్ కస్టడీ బుధవారంతో ముగియనుంది.
పూర్తి వివరాలు రికార్డ్
ఘటనకు సంబంధించిన వీడియోలను ఫ్రెండ్స్కు షేర్ చేసిన విషయంపై పోలీసులకు క్లారిటీ వచ్చింది. బాధితురాలి పట్ల అసభ్యంగా ప్రవర్తించిన వీడియోలు, ఫొటోలను ఎవరెవరికి పంపించారన్న వివరాలను వారి నుంచి రాబట్టారు. 17 మంది సాక్షుల్లో 8 మంది నుంచి స్టేట్మెంట్స్ తీసుకున్నారు. బాధిత బాలిక, ఆమె తల్లిదండ్రులు, పబ్ నిర్వాహకులు, బాధితురాలి ముగ్గురు స్నేహితులు సాక్షులుగా ఉన్నట్టు తెలుస్తోంది. బెంజ్, ఇన్నోవా కార్ల వివరాలు సహా అమ్నీషియా పబ్ నుంచి అత్యాచారం వరకు జరిగిన ఘటనల వివరాలను సాదుద్దీన్ సహా నిందితుల నుంచి తీసుకున్నారు. బాలికతో అసభ్యంగా ప్రవర్తిస్తున్న వీడియో, ఫొటోలు బయట పడటం వల్లే తాము దొరికామని, లేదంటే దొరికేవాళ్లమే కాదని నిందితులు చెప్పినట్టు తెలుస్తోంది. మైనర్కు ఎమ్మెల్యే కుమార్తె బెంజ్కారు ఇచ్చినట్టు విచారణలో తెలినట్లు, దీంతో ఆమెపైనా పోలీసులు కేసు నమోదు చేశారు. మైనర్కు కారు ఇచ్చినందుకు వారి కుటుంబసభ్యులపైనా కేసులు పెట్టారు. బెంజ్కారు, ఇన్నోవా పోలీసులకు దొరక్కుండా సాక్ష్యాధారాలు తారుమారు చేసే ప్రయత్నం చేసినట్టు సమాచారం. వక్ఫ్ బోర్డ్ చైర్మన్కు ప్రభుత్వం ఎలాంటి వాహనాన్ని కేటాయించలేదని పోలీసులు తేల్చారు. తన సొంత కారుకే గవర్నమెంట్ స్టిక్కర్ వేసుకున్నట్టు నిర్ధారించారు. ఇన్నోవా డ్రైవర్ స్టేట్మెంట్నూ రికార్డ్ చేసిన పోలీసులు.. ఘటన జరిగిన రోజు ఎవరెవరూ ప్రయాణించారన్న విషయాలను రాబట్టారు.
నిందితులు చెప్పిన వివరాలతో రిపోర్ట్
బెంజ్ కారు, ఇన్నోవాలో స్వాధీనం చేసుకున్న సాక్ష్యాధారాలు, వేలి ముద్రలు, 24 రకాల నమూనాలను పరీక్షించేందుకు ఇప్పటికే ఫోరెన్సిక్ సైన్స్ లేబొరేటరీకి పోలీసులు పంపించారు. నిందితుల కస్టడీలో భాగంగా సేకరించిన వివరాలతో తయారు చేసిన రిపోర్టును జువనైల్ జస్టిస్ బోర్డు, సిటీ పోలీస్ కమిషనర్కు అందించనున్నారు. ఆ రిపోర్టును సీపీ ఆధ్వర్యంలో ఏర్పాటు చేసిన స్పెషల్ టీమ్ పరిశీలించనుంది. ఫాస్ట్ట్రాక్ కోర్టులో చార్జిషీటు, బాధితురాలికి న్యాయం జరిగేందుకు చర్యలు తీసుకుంటున్నట్టు ఓ అధికారి తెలిపారు.
