న్యూఢిల్లీ: ఫోన్లోని డేటాను షేర్ చేయడానికి ఒప్పుకుంటే డబ్బులిస్తామని చెబుతోంది కేడెన్ అనే స్టార్టప్. ఇచ్చే డేటా సైజును బట్టి డబ్బును డాలర్లలో చెల్లిస్తామని చెబుతోంది. ముఖ్యంగా కస్టమర్షాపింగ్ సమాచారం, వాళ్లు చూసే కంటెంట్ వివరాలను ఇది తీసుకుంటుంది. ఉదాహరణకు మన ఫోన్లో అమెజాన్ యాప్ ఉంటే అందులోని సమాచారాన్ని కేడెన్ వాల్ట్లోకి తీసుకొని షేర్ చేసుకుంటుంది. ఈ డేటాను అడ్వర్టైజింగ్ అవసరాల కోసం వాడుకుంటామని, ఇలా వచ్చిన దాంట్లో కొంతమొత్తాన్ని కస్టమర్కు చెల్లిస్తామని కేడెన్ తెలిపింది.
సాధారణ పద్ధతుల్లో కస్టమర్ నుంచి డేటా తీసుకోవడం డిజిటల్ మార్కెటింగ్ కంపెనీలకు కష్టంగా మారింది. ప్రతి దానికీ పర్మిషన్లు అవసరం అవుతున్నాయి. అందుకే కంపెనీలు ఇలాంటి మార్గాల్లో డేటాను తీసుకుంటున్నాయి. వచ్చే ఏడాది నుంచి పది వేల మంది యూజర్ల గ్రూపుతో పబ్లిక్ బీటా టెస్టింగ్ మొదలుపెడతామని కేడెన్ ప్రకటించింది. షేర్ చేసే డేటాను బట్టి నెలకు 5–50 డాలర్ల వరకు చెల్లిస్తామని ప్రకటించింది. కస్టమర్డేటా స్కోర్ను బట్టి చెల్లించే మొత్తం ఉంటుందని తెలిపింది. ఈ కంపెనీకి గత నెల ఆరు మిలియన్ డాలర్ల ఫండింగ్ వచ్చింది.
