పరిమితికి మించి పామాయిల్ వాడకం.. ఖమ్మంలో బట్టబయలైన రెస్టారెంట్ల లోపాలు

నిల్వ చేసిన చికెన్ కబాబ్స్
ఖమ్మం సిటీలో పేరొందిన హోటళ్లు, రెస్టారెంట్లలో బయటపడ్డ లోపాలు
మోతాదుకు మించి పామాయిల్ వినియోగం
ఫుడ్ సేఫ్టీ ఆఫీసర్ల తనిఖీల్లో గుర్తింపు

ఖమ్మం/ ఖమ్మం టౌన్, వెలుగు: ఖమ్మం సిటీలోని రెస్టారెంట్లు, హోటళ్లలో ఫుడ్సేఫ్టీ అధికారులు ఆదివారం తనిఖీలు నిర్వహించారు. ఈ సందర్భంగా పలు చోట్ల రెస్టారెంట్లు, హోటళ్లలో ఫ్రీజర్లో దాచిన చికెన్ కబాబ్స్, ప్లాస్టిక్ బకెట్లలో మ్యారినేట్ చేసిన చికెన్, బ్యాచ్ నంబర్ లేని మసాలా ప్యాకెట్లు, మ్యానిఫ్యాక్చరింగ్ గడువు లేని పసుపు, ఎక్స్పైరీ డేట్ దాటిన సరుకులు, రూల్స్ అతిక్రమించి పామాయిల్ వినియోగం,.. ఇలా పలు లోపాలను, మోసాలను గుర్తించారు. ఖమ్మం, నల్గొండ, మహబూబ్నగర్జిల్లాల ఫుడ్సేఫ్టీ కంట్రోల్ ఆఫీసర్ జ్యోతిర్మయి ఆదివారం టాస్క్ఫోర్స్ టీమ్తో కలిసి ఖమ్మంలోని పలు హోటళ్లు, రెస్టారెంట్లలో తనిఖీలు నిర్వహించారు.

శ్రీశ్రీశ్రీ హోటల్, రెస్ట్ ఇన్ హోటల్లో తనిఖీల సందర్భంగా సిబ్బంది ఎవరికీ హెల్త్ ఫిట్నెస్ సర్టిఫికెట్లు లేవని తెలుసుకున్నారు. ఈ సందర్భంగా నాణ్యత లేని ఆహార పదార్థాలు సీజ్చేశారు. శాంపిల్స్ను పరీక్షల కోసం ల్యాబ్కు పంపించారు. అయితే, రెస్ట్ ఇన్ హోటల్లో ఫ్రీజర్లో నిల్వ చేసిన 12 కిలోల చికెన్ కబాబ్స్ను గుర్తించిన అధికారులు, వాటిని రూల్స్ ప్రకారం మున్సిపల్ సిబ్బందికి అప్పగించాల్సి ఉండగా..అక్కడే డ్రైనేజీలో పారబోయడంపై విమర్శలు
వ్యక్తమవుతున్నాయి.

అంతా రూల్స్కు విరుద్ధమే..

రెస్ట్ ఇన్ హోటల్లో ఏ బ్రాండ్ లేని, తయారీ తేదీ లేని 60 కిలోల పసుపు, 4 కిలోల నూడుల్స్, ఫ్రిజ్లో నిల్వ చేసిన 12 కిలోల చికెన్ కబాబ్లు కనిపించాయి. శ్రీశ్రీ హోటల్లో రూల్స్ ప్రకారం వంటల్లో 15 శాతం పామాయిల్ వాడాల్సి ఉండగా..23 శాతం వినియోగిస్తున్నట్టు గుర్తించారు. ఫ్రీజర్ను మైనస్80 డిగ్రీల్లో ఉంచి వస్తువులు నిల్వ చేయాల్సి ఉండగా, మైనస్120 డిగ్రీలు ఉండడంపై ఆగ్రహం వ్యక్తం చేశారు.

నిర్వాహకులు చపాతి, పరోటా పిండిని కలిపి

ప్లాస్టిక్ కవర్లలో పెట్టి ఫ్రిజ్లో నిల్వ ఉంచారు. చికెన్ధమ్ బిర్యానీ కోసం మ్యారినేట్ చేసిన చికెన్ను ప్లాస్టిక్ బకెట్లో నిల్వ చేశారు. దీంతో మ్యారినేట్ చేసిన చికెన్ను బయటపడేయించారు. కిచెన్ను అపరిశుభ్రంగా ఉంచడంపై అధికారులు ఫైర్ అయ్యారు. స్టోర్రూమ్స్లో ఎక్స్పైరీ అయిన జీలకర్ర, బ్రాండెడ్ కాని జీడిపప్పు, గోధుమ పిండిని గుర్తించి సీజ్ చేశారు. ఫుడ్సేఫ్టీ నిబంధనలను పాటించకపోతే పర్మిషన్ రద్దు చేస్తామని వార్నింగ్ ఇచ్చారు. ఆహార వస్తువులపై లేబుల్స్, బ్యాచ్ నంబర్లేకపోతే ఫైన్తో పాటు, జైలు శిక్ష అనుభవించాల్సి ఉంటుందని హెచ్చరించారు.

ఏడు నెలల్లో కేవలం14 కేసులే..

ఉమ్మడి ఖమ్మం జిల్లా పరిధిలో 300 హోటళ్లు,28 రెస్టారెంట్లు ఉండగా ఏడు నెలల్లో అధికారులు తనిఖీలు చేసి 14 కేసులు మాత్రమే నమోదు చేశారు. హైదరాబాద్ స్థాయిలో ఒత్తిళ్లు వస్తే తప్పా తనిఖీలు చేయరన్న విమర్శలున్నాయి. ఫిర్యాదులు వచ్చినప్పుడు తప్పించి, రెగ్యులర్గా సోదాలు చేయరనే ఆరోపణలున్నాయి. మామూళ్ల వ్యవహారం కారణంగా చూసీ చూడనట్టు వదిలేస్తారనే విమర్శలున్నాయి.