న్యూఢిల్లీ: పదేళ్ల అస్తవ్యస్త పాలన తర్వాత సరిగ్గా లోక్ సభ ఎన్నికల ముంగిట ప్రధాని మోదీకి దేశ సరిహద్దుల సమగ్రత, నేషనల్ సెక్యూరిటీ గుర్తుకొచ్చిందంటూ కాంగ్రెస్ పార్టీ చీఫ్మల్లికార్జున ఖర్గే మండిపడ్డారు. కచ్చతీవు దీవులను శ్రీలంకకు అప్పగించడంపై ప్రధాని మోదీ చేసిన విమర్శలను ఖర్గే తిప్పికొట్టారు. పదేళ్ల తర్వాత సడెన్ గా నిద్రలేచి, ఎన్నికల ముందు ఈ సున్నిత అంశాన్ని ప్రస్తావించడం మోదీలోని నిరాశను బయటపెడుతోందని అన్నారు. రెండు టర్మ్ లు దేశాన్ని పాలించిన బీజేపీ సర్కారు కచ్చతీవు దీవులను ఎందుకు తిరిగి తీసుకోలేకపోయిందంటూ ఖర్గే ట్వీట్ చేశారు. 1974లో శ్రీలంకతో జరిగిన స్నేహపూర్వక ఒప్పందంలో భాగంగా కచ్చతీవు దీవులను ఆ దేశానికి అప్పగించడం జరిగిందన్నారు.
బీజేపీ మొదటి టర్మ్ పాలనలోనూ బంగ్లాదేశ్తో ఇలాంటి ఒప్పందమే కుదుర్చుకుందని ఖర్గే గుర్తుచేశారు. ఇండియా, బంగ్లాదేశ్ల మధ్య సరిహద్దులకు సంబంధించి కుదిరిన ఈ ఒప్పందం కేవలం భూమి గురించి మాత్రమే కాదని, రెండు హృదయాల కలయిక అని మోదీ చెప్పారని గుర్తుచేశారు. ఈ ఒప్పందం ప్రకారం బంగ్లాదేశ్లోని 111 భారత భూభాగాల(ఎంక్లేవ్స్)పై హక్కులను మోదీ సర్కార్ ఆ దేశానికి బదిలీ చేసిందని చెప్పారు. బంగ్లా నుంచి 55 భూభాగాలపై హక్కులు మన దేశానికి సంక్రమించాయని వివరించారు.
