అది న్యూయార్క్లోని మెట్రోపాలిటన్ మ్యూజియం ఆఫ్ ఆర్ట్. ‘మెట్ గాలా 2021’ ఈవెంట్ జరుగుతోంది. హాలీవుడ్ సెలబ్రిటీలు ఒక్కొక్కరుగా రెడ్ కార్పెట్ మీద ఫ్యాషన్ డ్రెస్సులు వేసుకుని స్టయిలిష్గా నడుస్తున్నారు. ఫొటోలకి పోజులిస్తున్నారు. అంతలోనే తల నుంచి పాదాల వరకు నల్లటి డ్రెస్ వేసుకున్న ఒకరు నడుచుకుంటూ వచ్చారు అక్కడికి. బ్లాక్ డ్రెస్ వేసుకుని మ్యూజియంలోకి ఎంట్రీ ఇచ్చింది ఎవరో కాదు... అమెరికన్ నటి కిమ్ కర్దాషియాన్. నల్లని పోనీటెయిల్, బ్లాక్ గౌన్కి మ్యాచింగ్ మాస్క్ పెట్టుకుని, శాండిల్స్ వేసుకున్న కిమ్ని చూసి అక్కడివాళ్లంతా షాకయ్యారు. కెమెరాలన్నీ ఆమెవైపు తిరిగాయి. ముఖం కూడా కనిపించకుండా నల్లని ముసుగు వేసుకున్నట్టు ఉన్న ఆమెని ముందుగా ఎవ్వరూ గుర్తుపట్టలేదు. ఫండ్ రైజింగ్ కోసం నిర్వహించిన ఈవెంట్కి బెలెన్సియాగ కంపెనీ క్రియేటివ్ డిజైనర్ డెమ్నా గ్వసాలియాతో కలిసి వెళ్లింది కిమ్. గాలా ఈవెంట్కి స్పెషల్ అట్రాక్షన్గా నిలిచిన ఆమె అవుట్ఫిట్ ఇప్పుడు నెట్లో వైరల్ అవుతోంది.
ఫ్యాషన్ అంటే పిచ్చి
కిర్దాషియానాకి ఫ్యాషనబుల్గా కనిపించడం చాలా ఇష్టం. అందుకోసం వెరైటీ అవుట్ఫిట్స్ వేసుకుంటుంది కూడా. ఈసారి ‘మెట్గాలా’ ఈవెంట్ని సీరియస్గా తీసుకున్న కిమ్ తన స్పెషాలిటీ చూపించాలనుకుంది. ఆమె అనుకున్నట్టుగానే ‘మెట్ గాలా’ డ్రెస్ సోషల్మీడియాలో చక్కర్లు కొడుతోంది.
