- ఎక్కువ నిధులు వచ్చేలా కృషి చేస్తా: కిషన్ రెడ్డి
- కాజీపేట రైల్వే డివిజన్‌‌‌‌‌‌‌‌పై చర్చ జరగలేదని..డిమాండ్లు కూడా రాలేదని వెల్లడి
వరంగల్‍, వెలుగు: మేడారం సమ్మక్క, సారలమ్మ జాతరకు జాతీయ హోదా ఇవ్వలేమని కేంద్ర బొగ్గు, గనుల శాఖ మంత్రి కిషన్రెడ్డి తేల్చి చెప్పారు. హనుమకొండలోని హరిత కాకతీయ హోటల్‌‌‌‌‌‌‌‌లో శనివారం ఆయన మీడియాతో మాట్లాడారు. దేశంలో ఇప్పటివరకు జాతరలకు, మేళాకు జాతీయహోదా ఇవ్వలేదని గుర్తు చేశారు.
మేడారం జాతర నిర్వహణకు గతంలో రూ.18 కోట్లు ఇచ్చామని, ఈ సారి కూడా ప్రత్యేక చొరవ తీసుకొని ఎక్కువ నిధులు తీసుకువచ్చేలా కృషి చేస్తానని హామీ ఇచ్చారు. కాజీపేట జంక్షన్‌‌‌‌‌‌‌‌కు డివిజన్‌ హోదా కల్పించే అంశంపై తమ పార్టీలో ఎలాంటి చర్చ జరగలేదని.. ఈ అంశంపై ఇప్పటివరకు ఎవరూ డిమాండ్‌ కూడా చేయలేదన్నారు.
‘పీఎం మిత్ర మెగా టెక్స్‌‌‌‌‌‌‌‌టైల్‌ పార్క్‌’ పేరుతో కేంద్ర ప్రభుత్వం దేశంలో ఏడు చోట్ల టెక్స్‌‌‌‌‌‌‌‌టైల్‌ పార్క్‌‌‌‌‌‌‌‌లను అభివృద్ధి చేస్తోందని, వరంగల్‌‌‌‌‌‌‌‌లోని కాకతీయ మెగా టెక్స్‌‌‌‌‌‌‌‌టైల్‌ పార్క్‌‌‌‌‌‌‌‌ను రూ.200 కోట్లతో బ్రౌన్‍ ఫీల్డ్‌‌‌‌‌‌‌‌లో డెవలప్‌ చేయబోతున్నట్లు చెప్పారు. మామునూర్‌ ఎయిర్‌‌‌‌‌‌‌‌పోర్ట్‌ భూసేకరణను పూర్తి చేసి అప్పగిస్తే... వెంటనే నిర్మాణ పనులు మొదలుపెడతామన్నారు. మొదట్లో హైదరాబాద్‍, షిర్డీ, తిరుపతి, బెంగళూర్‌ వంటి ప్రాంతాలకు.. ఆ తర్వాత పెద్ద విమానాలు నడిపిస్తామన్నారు.
ఈటల, రాజగోపాల్‍ పదవులకు రాజీనామా చేసొచ్చిన్రు
రాష్ట్రంలో బీసీ రిజర్వేషన్లను ముస్లింలే వాడుకుంటున్నారని.. దీంతో అసలైన బీసీలకు అన్యాయం జరుగుతోందని కేంద్ర మంత్రి కిషన్రెడ్డి అన్నారు. గతంలో 56% ఉన్న బీసీ రిజర్వేషన్లను ప్రభుత్వం 42 శాతానికి తగ్గించిందన్నారు. ఇందులోనూ 10% ముస్లింలకు ఇవ్వడం ద్వారా.. బీసీలకు 32 శాతమే దక్కుతుందన్నారు. పార్టీ ఫిరాయింపుల విషయంలో బీఆర్‍ఎస్‍, కాంగ్రెస్‍ బొమ్మాబొరుసు వంటివన్నారు. ఈటల, కోమటిరెడ్డి రాజగోపాల్‍రెడ్డి వంటి లీడర్లు బీజేపీలోకి వచ్చేటప్పుడు పదవులకు రాజీనామా చేశారని గుర్తు చేశారు.
రైల్వే నెట్వర్క్ పెంచుతాం
తెలంగాణ రాష్ట్రంలో రైల్వే నెట్వర్క్ పెంచుతామని, రాబోయే రెండు, మూడేండ్లలో రైల్వే స్టేషన్ల రూపురేఖలు మారుస్తామని చెప్పారు. శనివారం ఉదయం ఆయన వందే భారత్‌ రైలులో వరంగల్‍ రైల్వే స్టేషన్‌కు చేరుకున్నారు. అనంతరం భద్రకాళి, వెయ్యిస్తంభాల ఆలయాల్లో పూజలు నిర్వహించి అభివృద్ధి పనులపై అధికారులతో మాట్లాడారు. కాజీపేట రైల్వే మ్యానుఫ్యాక్చరింగ్‍ యూనిట్‌ను సందర్శించి పనుల పురోగతిని పరిశీలించారు.
ఈ సందర్భంగా కిషన్రెడ్డి మాట్లాడుతూ.. రాష్ట్రంలో 40 రైల్వే స్టేషన్లను అత్యాధునికంగా అభివృద్ధి చేస్తామన్నారు. కాజీపేటలోని ఆర్‍ఎంయూ పనులు 75 శాతం పూర్తయ్యా యని.. వచ్చే ఏడాది ప్రారంభిస్తామని చెప్పారు. మొదటి దశలో రూ.521 కోట్లతో గ్రీన్‌ క్యాంపస్‌ కాన్సెప్ట్‌లో పనులు చేపడుతున్నామన్నారు. ఆయన వెంట సౌత్‍ సెంట్రల్‍ రైల్వే జీఎం సంజయ్‌కుమార్‌ శ్రీవాస్తవ, చీఫ్‌ మెకానికల్‌ ఇంజినీర్‌ బిజయ్‌కుమార్‌ పాల్గొన్నారు.
