హైదరాబాద్, వెలుగు: లైవ్‌‌స్టాక్ (పశు సంపద), డెయిరీ (పాడి పరిశ్రమ), ఫిషరీస్(మత్స్య సంపద) ట్రేడ్ ఎక్స్‌‌పోజిషన్ ఈ ఏడాది సెప్టెంబరులో జరగనుంది. ఈ కార్యక్రమంలోనే నాలెడ్జ్ కాన్క్లేవ్ కూడా ఉంటుంది. హైదరాబాద్లో బుధవారం ఏర్పాటు చేసిన మీడియా సమావేశంలో నేషనల్ ఫిషరీస్ డెవలప్‌‌మెంట్ బోర్డ్ మాజీ చీఫ్ ఎగ్జిక్యూటివ్ సువర్ణ మాట్లాడుతూ తెలంగాణ, ఆంధ్రప్రదేశ్ రెండు రాష్ట్రాలకు ఈ రంగాల్లో చాలా మంచి అవకాశాలు ఉన్నాయని చెప్పారు.
పశుసంపదలో తెలంగాణ మొదటి స్థానంలో ఉందని, గుడ్ల ఉత్పత్తి భారీగా జరుగుతున్నదని అన్నారు. చేపల పెంపకంలో తెలుగు రాష్ట్రాలు అద్భుత విజయాలు సాధించాయని చెప్పారు. అందుకే ఈ ఈవెంట్‌‌ను నిర్వహించడానికి హైదరాబాద్‌‌ను ఎంచుకున్నామని ఆమె తెలిపారు. మూడు రోజుల బిజినెస్ -టు -బిజినెస్ ఈవెంట్‌‌లో భారతదేశం అంతటి నుంచి100 మంది ఎగ్జిబిటర్లు పాల్గొంటారు. దీనిని హైటెక్స్, ఆక్వా ఫార్మింగ్ టెక్నాలజీస్ అండ్ సొల్యూషన్స్ ప్రైవేట్ లిమిటెడ్ సంయుక్తంగా నిర్వహిస్తున్నాయి.
