- ప్రాణాంతక బ్యాక్టీరియాను అడ్డుకునే పద్ధతిని గుర్తించిన సీసీఎంబీ
- బ్యాక్టీరియాలో తప్పులను పీజీఈఎఫ్ ఎంజైమ్సరిదిద్దుతున్నట్టు తేల్చిన సైంటిస్టులు
- సెల్వాల్లో తప్పుడు అమైనో యాసిడ్స్ చేరకుండా బ్యాక్టీరియాకు సంకేతాలు
- దాని ఆధారంగా కొత్త యాంటీబయోటిక్స్ను అభివృద్ధి చేసేందుకు చాన్స్
హైదరాబాద్, వెలుగు: యాంటీబయోటిక్స్కు బ్యాక్టీరియాలు రెసిస్టెన్స్ను సంతరించుకుంటున్నాయి. దీంతో మందులకు లొంగకుండా మొండిగా తయారవుతున్నాయి. మరోవైపు కొత్త యాంటీ బయోటిక్లు రాక దశాబ్దాలవుతున్నాయి. దీంతో కొత్త యాంటీబయోటిక్స్పై సైంటిస్టులు దృష్టి పెట్టాల్సిన పరిస్థితి ఏర్పడింది.
ఈ నేపథ్యంలోనే హైదరాబాద్లోని సెంటర్ ఫర్ సెల్యులార్ అండ్ మాలిక్యులర్ బయోలజీ (సీసీఎంబీ) సైంటిస్టులు చేసిన ఓ తాజా పరిశోధన.. కొత్త యాంటీబయోటిక్ ల తయారీపై ఆశలు రేకెత్తిస్తున్నది.
మెరుగైన, సమర్థవంతమైన యాంటీబయోటిక్స్ను అభివృద్ధి చేసేందుకు ఆ అధ్యయనం తోడ్పడుతుందన్న ఆశాభావం కలుగుతున్నది. బ్యాక్టీరియా సెల్ వాల్ నిర్మాణంలో కీలకపాత్ర పోషించే పెప్టిడోగ్లైకాన్ ఎడిటింగ్ ఫ్యాక్టర్(పీజీఈఎఫ్) అనే ఎంజైమ్ను టార్గెట్ చేస్తే, కొత్త యాంటీయోటిక్స్ను తయారు చేసేందుకు మార్గం సుగమం అవుతుందని సైంటిస్టులు భావిస్తున్నారు.
సీసీఎంబీకి చెందిన సీనియర్ సైంటిస్ట్ డాక్టర్ మంజులా రెడ్డి నేతృత్వంలోని శాస్త్రవేత్తల బృందం.. వివిధ బ్యాక్టీరియాల్లోని సెల్ వాల్ నిర్మాణంలో జరిగే తప్పులను పీజీఈఎఫ్ అనే ఎంజైమ్ ప్రూఫ్ రీడింగ్ చేసి.. ఆ తప్పులను సరిదిద్ది బ్యాక్టీరియాను స్ట్రాంగ్
చేస్తుందని తేల్చారు.
అమైనో యాసిడ్స్కు బదులు..
మామూలుగా బ్యాక్టీరియా సెల్వాల్ వివిధ రకాల షుగర్, అమైనో యాసిడ్లతో నిర్మితం అవుతుంది. ఈ అమైనో యాసిడ్ల చెయిన్లో అత్యంత ముఖ్యమైనది ఎల్అలనైన్. అయితే, ఒక్కోసారి సెల్ వాల్ నిర్మాణంలో బ్యాక్టీరియా పొరపాటున ఎల్ అలనైన్కు బదులు దాని నిర్మాణాన్ని పోలి ఉండే ఎల్సెరీన్ లేదా గ్లైసిన్ అనే అమైనో యాసిడ్లను సెల్వాల్లో యాడ్ చేస్తుంటుంది.
ఈ ఎల్సెరీన్ను యాడ్ చేయడం ద్వారా బ్యాక్టీరియా కణత్వచం బలహీనమై యాంటీబయోటిక్స్ పనిని సులువు చేస్తుంటుంది. ఇలాంటి తప్పులు జరగకుండా చూసేందుకు బ్యాక్టీరియాలోనే ఈ పీజీఈఎఫ్ ఎంజైమ్.. ప్రూఫ్ రీడ్ చేసి ఆ తప్పును సరిదిద్దేలా బ్యాక్టీరియాకు సంకేతాలు ఇస్తుంటుంది. ‘‘హై రెజల్యూషన్ మాస్ స్పెక్ట్రోమెట్రీ, కాంబినేషన్ను ఉపయోగించి బ్యాక్టీరియాలో పీజీఈఎఫ్ పాత్ర ఏంటో గుర్తించాం.
తప్పుడు అమైనో యాసిడ్స్ను పీజీఈఎఫ్ గుర్తించి తొలగిస్తుంది. దాని స్థానంలో సెల్వాల్లో సరైనఅమైనో యాసిడ్ను చేర్చుకునేలా బ్యాక్టీరియాకు సంకేతాలను ఇస్తున్నట్టు గుర్తించాం’’ అని రీసెర్చ్లో పాల్గొన్న మరో సైంటిస్టు డాక్టర్ శాంభవి గర్డే తెలిపారు.
యాంటీబయోటిక్స్ టార్గెట్ అదే..
ఇప్పుడున్న యాంటీబయోటిక్స్ టార్గెట్.. బ్యాక్టీరియాలోని సెల్ వాలే. సెల్వాల్ సింథసిస్ను నిరోధించడం ద్వారా హానికారక, ప్రాణాంతక బ్యాక్టీరియాకు యాంటీబయోటిక్లు చెక్ పెడుతుంటాయి. అయితే, ఇటీవలి కాలంలో బ్యాక్టీరియాకు రెసిస్టెన్స్ పెరిగిపోతున్నట్టు వివిధ అధ్యయనాల్లో తేలింది. ఈ క్రమంలోనే బ్యాక్టీరియా వృద్ధిలో కీలకమైన పీజీఈఎఫ్ లాంటి ఎంజైమ్లను టార్గెట్ చేసుకుంటే కొత్త యాంటీబయోటిక్ను తయారు చేయొచ్చన్న అభిప్రాయాలు వ్యక్తమవుతున్నాయి.
ఇంకో ఆసక్తికరమైన విషయమేంటంటే.. పీజీఈఎఫ్ లాంటి ఎంజైమే మనుషుల్లోనూ ఉన్నట్టు సీసీఎంబీ సైంటిస్టులు గుర్తించారు. ఎల్ఏసీసీ1గా పిలుస్తున్న ఆ ఎంజైమ్కు వివిధ ఆటోఇమ్యూన్ డిజార్డర్స్తో సంబంధం ఉందని గుర్తించారు. దీని ద్వారా మన రోగనిరోధక వ్యవస్థ హైపర్ యాక్టివేట్ అవుతున్నట్టు చెబుతున్నారు.
ప్రస్తుతానికి ఎల్ఏసీసీ1 పనితీరుపై స్పష్టమైన ఆధారాలు లేకపోయినా.. బ్యాక్టీరియాకు మన రోగనిరోధక వ్యవస్థ స్పందించే తీరులో ఎల్ఏసీసీ1 పాత్రను తేల్చవచ్చని, భవిష్యత్తులో ఆటోఇమ్యూన్ డిజార్డర్లకూ మరింత సమర్థవంతమైన చికిత్స అందించేందుకు అవకాశం ఏర్పడుతుందని సైంటిస్టులు చెబుతున్నారు.
