రాష్ట్రంలోని ఎస్సీ, ఎస్టీలు అగ్రవర్ణాల కంటే మూడు రెట్లు ఎక్కువ వెనుకబడి ఉన్నారని నివేదిక వెల్లడించింది. బీసీలు కూడా అగ్రవర్ణాల కంటే 2.7 రెట్లు వెనుకబడి ఉన్నారు. మొత్తం 242 కులాల్లో 135 కులాలను ‘అత్యంత వెనుకబడినవి’గా గుర్తించారు. ఈ 135 కులాల్లోనే రాష్ట్ర జనాభాలో 67 శాతం మంది ఉన్నారు. ఈ కులాలు రాష్ట్ర సగటు కంటే ఎక్కువ వెనుకబడి ఉండటం గమనార్హం. ముఖ్యంగా ఎస్టీల్లో 99 శాతం, ఎస్సీల్లో 97 శాతం, బీసీల్లో 71 శాతం మంది ప్రజలు రాష్ట్ర సగటు కంటే వెనుకబడి ఉండటం ఆందోళన కలిగించే అంశం. మరోవైపు, అగ్రవర్ణాలకు చెందిన 18 కులాలూ రాష్ట్ర సగటు కంటే మెరుగైన స్థితిలోనే ఉన్నాయని సీబీఐ ర్యాంకింగ్స్ స్పష్టం చేశాయి.
వడ్డీ వ్యాపారులపై ఆధారపడుతున్న పేదలు
ఆర్థిక అత్యవసరాల కోసం పేద వర్గాలు ఇంకా ప్రైవే టు వడ్డీ వ్యాపారుల పైనే ఆధారపడుతున్నారని నివేదిక స్పష్టం చేసింది. ఎస్టీల్లో 9.7 శాతం, ఎస్సీల్లో 8.8 శాతం కుటుంబాలు వడ్డీ వ్యాపారుల వద్ద అప్పులు తీసుకున్నాయి. అగ్రవర్ణాల్లో ఈ శాతం కేవలం 5.1 మాత్రమే. ముఖ్యంగా వివాహాలు, ఆరోగ్య సమస్యల కోసం తీసుకునే రుణాల్లో ఎస్సీలు (10.9%) అగ్రస్థానంలో ఉన్నారు.
ALSO READ : లక్షలోపే 78 శాతం తెలంగాణ కుటుంబాల ఆదాయం..
సంస్థాగత పరపతి (బ్యాంకులు) అందకపోవడం, పొదుపు లేకపోవడం వల్ల ఈ వర్గాలు అప్పుల ఊబిలో కూరుకుపోతున్నాయి. వైద్య ఖర్చుల కోసం అప్పులు చేయాల్సి రావడం ప్రజారోగ్యంపై ప్రభుత్వం మరింత దృష్టి పెట్టాల్సిన అవసరాన్ని సూచిస్తోంది.
