- ఎల్లంపల్లి నుంచే
- మల్లన్నసాగర్కు నీరు: యెన్నం శ్రీనివాస్ రెడ్డి
హైదరాబాద్, వెలుగు: కాళేశ్వరం ప్రాజెక్ట్ పెద్ద బోగస్ అని వరుణ దేవుడు నిరూపించాడని మహబూబ్నగర్ ఎమ్మెల్యే యెన్నం శ్రీనివాస్ రెడ్డి అన్నారు. మేడిగడ్డ, అన్నారం, సుందిళ్ల బ్యారేజీల నుంచి నీటిని ఎత్తిపోయకున్నా.. ఎల్లంపల్లి ప్రాజెక్టు, మిడ్మానేరు నుంచే మల్లన్నసాగర్కు నీళ్లు చేరాయని తెలిపారు.
కేసీఆర్, హరీశ్రావు, ఇతర బీఆర్ఎస్ నేతలు చెప్పే మాటలన్నీ అబద్ధాల పుట్టేనని విమర్శించారు. శనివారం ఆయన సెక్రటేరియెట్లో మీడియాతో మాట్లాడారు. ప్రస్తుతం ఒక్క టీఎంసీ నీటిని లిఫ్ట్ చేయకుండానే లక్షల ఎకరాలకు నీళ్లిస్తున్నామన్నారు.
నాడు ప్రాణహిత ప్రాజెక్టుకు కాంగ్రెస్ ప్రభుత్వం డిజైన్ చేసింది. తుమ్మిడిహెట్టి దగ్గర ప్రాజెక్టు కట్టి చేవెళ్ల వరకు నీళ్లు ఇవ్వాలనుకున్నది. అలాంటి ప్రాజెక్టును పక్కకు పెట్టి లక్షల కోట్లు గోదావరి పాల్జేశారు.
కాళేశ్వరం గుండె కాయ మేడిగడ్డ అని కేసీఆర్అన్నారు. కానీ, ఇప్పుడు మేడిగడ్డ నుంచి నీళ్లు రాకున్నా మిడ్ మానేరు కింద ఉన్న రిజర్వాయర్లు ఎలా నిండాయి?’’ అని ఫైర్అయ్యారు. గత బీఆర్ఎస్ సర్కార్ రూ.లక్ష కోట్ల ప్రజాధనం దుర్వినియోగం చేసిందని ఆరోపించారు. ఆ బండారం బయటపడుతుందనే పీఏసీలో నానా హంగామా చేసి బాయ్కాట్ చేశారని శ్రీనివాస్ రెడ్డి విమర్శించారు.
కుంభకోణం చేసిన మంత్రులు పీఏసీ చైర్మన్ అయ్యి ఆ కుంభకోణాన్ని కప్పేయాలనుకున్నారని తెలిపారు. కానీ, అదృష్టవశాత్తు ఆ కుటుంబం చేతిలో పీఏసీ చైర్మన్ పదవి లేదన్నారు. ఎస్ఎల్బీసీని కేసీఆర్ఎప్పుడూ ప్రస్తావించలేదని, ఇప్పుడు తమ సర్కార్ పునర్నిర్మిస్తున్నదని వెల్లడించారు. కేసీఆర్ డిజైన్ చేసిన ప్రతి ప్రాజెక్టులోనూ నిర్మాణ లోపం ఉందని శ్రీనివాస్ రెడ్డి పేర్కొన్నారు.
