గాంధీ జయంతి సందర్భంగా మహారాష్ట్ర ప్రభుత్వం సరికొత్త ప్రచారానికి శ్రీకారం చుట్టింది. ఫోన్‌లో హలో బదులుగా వందేమాతరం అందాం అంటూ ప్రచారాన్ని మొదలుపెట్టింది. ప్రజల్లో జాతీయతా భావాన్ని పెంపొందించేందుకు ఈ ప్రచారాన్ని స్టార్ట్ చేసినట్టు స్పష్టం చేసింది. ఫోన్‌కాల్స్‌ వచ్చినప్పుడు అవతలి వ్యక్తిని పలకరించడానికి ప్రతిఒక్కరూ వాడే ‘హలో’కు బదులుగా ఇకపై ‘వందేమాతరం’ అనాలని ప్రజలకు విజ్ఞప్తి చేసింది. దీనికి సంబంధించిన ఓ తీర్మానాన్ని శిండే సర్కార్ జారీ చేసింది. అయితే ఇది తప్పనిసరేం కాదని, వివిధ ప్రభుత్వ శాఖల్లోని అధిపతులు తమ సిబ్బందిని ‘వందేమాతరం’ అనేలా ప్రోత్సహించాలని కోరింది. దీనిపై ప్రజల్లోనూ అవగాహన కల్పించేందుకు ప్రచారం మొదలుపెట్టింది. ఈ కార్యక్రమాన్ని మహాత్మాగాంధీ జయంతి సందర్భంగా వార్ధాలో మహారాష్ట్ర సాంస్కృతిక వ్యవహారాలశాఖ మంత్రి సుధీర్‌ ముంగంటివార్‌ ప్రారంభించారు. మహారాష్ట్ర ఏర్పాటులో కీలక పాత్ర పోషించిన 850 మంది ముఖ్య వ్యక్తులపై రాష్ట్ర ప్రభుత్వం ఆడియో బుక్‌ రూపొందించనుందని ఈ సందర్భంగా ఆయన వెల్లడించారు.
