కాస్త పులుపు..ఇంకాస్త తీపి.. మరికాస్త వగరు ఈ రుచులన్నీ కలిపితే నేరేడు పండ్లు. నిగనిగలాడుతూ నోరూరించే ఈ పండ్లలో ఫైబర్ ఎక్కువగా ఉంటుంది. ఒక కప్పు నేరేడులో 30.2 మిల్లీ గ్రాముల విటమిన్– సి ఉంటుంది. విటమిన్ –ఎ, బి1, బి2, బి3, బి6, కే, ఈలు కూడా పుష్కలం. ఐరన్, మాంగనీస్, పొటాషియం కూడా ఎక్కువే. ఆరోగ్యానికి ఇంత మేలు చేసే ఈ పండుని ఎప్పుడూ ఒకేలా ఎందుకు తినాలి. కాస్త వెరైటీగా తింటే రుచికి రుచి ఆరోగ్యానికి ఆరోగ్యం. అందుకని హల్వా, ఐస్క్రీమ్, స్మూతీ చేసేయండి... టేస్టీటేస్టీగా తినేయండి.
హల్వా
కావాల్సినవి
నేరేడు పండ్లు– ఒక కప్పు
పాలు(కాచి, చల్లార్చినవి)– ఒక కప్పు
చక్కెర– అర కప్పు
నెయ్యి– మూడు టీ స్పూన్లు
డ్రై ఫ్రూట్స్ (పలుకులు) – అర టేబుల్ స్పూన్
బ్రెడ్ ముక్కలు– అర కప్పు
కోవా– రెండు టీ స్పూన్లు
యాలకుల పొడి– ఒక టీ స్పూన్
కిస్మిస్– ఒక టీ స్పూన్
తయారీ
నేరేడు పండ్లని శుభ్రంగా కడిగి, గింజలు తీసి చిన్న చిన్న ముక్కలు చేయాలి. పాన్లో రెండు టీ స్పూన్ల నెయ్యి వేడిచేసి అందులో డ్రైఫ్రూట్స్ తరుగు, కిస్మిస్ వేగించి ఒక గిన్నెలోకి తీయాలి. అదే పాన్లో మిగిలిన నెయ్యి వేడిచేసి నేరేడు ముక్కలు వేగించాలి. అందులో కోవా, పాలు, చక్కెర కూడా వేసి బాగా కలపాలి. మిశ్రమం దగ్గర పడ్డాక బ్రెడ్ ముక్కలు కలిపి మరికాసేపు ఉడికించాలి. చివరగా యాలకుల పొడి వేసి తింటే టేస్ట్ అదిరిపోతుంది.
ఐస్క్రీమ్
కావాల్సినవి
నేరేడు పండ్లు– 100గ్రాములు
ఫ్రెష్ క్రీమ్– ఒక కప్పు
చక్కెర– ఒక కప్పు
పాలు– అర కప్పు
తయారీ
నేరేడు పండ్లని చేతితో మాష్ చేసి, గింజలు తీసేయాలి. తరువాత మిక్సీ జార్లో వేసి కచ్చాపచ్చాగా గ్రైండ్ చేయాలి. అందులో చక్కెర వేసి మరోసారి గ్రైండ్ చేయాలి. తర్వాత ఫ్రెష్ క్రీమ్, పాలు కూడా వేసి ఇంకోసారి మిక్సీ పట్టి ఒక బాక్స్లోకి తీయాలి. ఆ బాక్స్ని ఎనిమిది గంటలు డీప్ ఫ్రిజ్లో పెడితే నోరూరించే నేరేడుపండు ఐస్క్రీమ్ రెడీ.
పచ్చడి
కావాల్సినవి
నేరేడు పండ్లు– ఒక కప్పు
కారం, ఉప్పు– సరిపడా
పసుపు, ఇంగువ– చిటికెడు
నూనె– తగినంత
ఆవాలు– ఒక టీ స్పూన్
చక్కెర, మెంతులు– ఒక్కోటి పావు టీ స్పూన్ చొప్పున
కరివేపాకు– కొంచెం
తయారీ
నేరేడు పండ్ల గింజలు తీసి, చిన్న చిన్న ముక్కలుగా తరగాలి. పాన్లో నూనె వేడిచేసి ఆవాలు, మెంతులు వేగించాలి. అందులో ఇంగువ, కరివేపాకు, నేరేడు ముక్కలు, పసుపు, ఉప్పు ఒకదాని తర్వాత ఒకటి వేసి కాసేపు మూతపెట్టాలి. తర్వాత కారం , చక్కెర వేసి బాగా కలిపి స్టవ్ ఆపేయాలి. పదినిమిషాల తర్వాత బాక్స్లోకి తీయాలి. రైస్తో పాటు చపాతి, బ్రెడ్స్పై టేస్టీగా ఉంటుంది ఈ పచ్చడి.
