ఓయూ, వెలుగు: రాష్ట్ర ప్రభుత్వం చేపట్టిన ఎస్సీ వర్గీకరణ చట్టం ద్వారా రోస్టర్ విధానంతో మాలలకు అన్యాయం జరుగుతోందని ఆల్ మాల స్టూడెంట్ అసోసియేషన్ ఓయూ అధ్యక్షుడు నామా సైదులు అన్నారు. ఆదివారం ఏఐసీసీ ఎస్సీ కమిషన్ చైర్మన్ రాజేంద్రపాల్ గౌతమ్ ను కలిసి రోస్టర్ విధానం వల్ల మాల విద్యార్థులు, ఉద్యోగులకు జరిగే నష్టాలపై వివరించారు.
ఈ సందర్భంగా ఆయన మాట్లాడుతూ.. ఎస్సీలోని గ్రూప్ త్రీలో చేర్చిన 26 కులాల విద్యార్థులు, నిరుద్యోగులకు ఉద్యోగ అవకాశాలు లేకుండా పోతాయన్నారు. ఈ విషయాన్ని సీఎం రేవంత్ రెడ్డితో చర్చించి రోస్టర్ విధానాన్ని సవరించేలా చూడాలని కోరారు. ఈ కార్యక్రమంలో కాంగ్రెస్ నాయకులు గడ్డం శ్రీనివాస్, కార్తీక్, రేణు, సంతోష్, ప్రవీణ్ పాల్గొన్నారు.
