- బీజేపీకి మమతా బెనర్జీ సవాల్
కృష్ణానగర్(బెంగాల్): వచ్చే పార్లమెంట్ ఎన్నికల్లో బీజేపీకి 400 ఎంపీ స్థానాలు గెలిచేంత సీన్ లేదని బెంగాల్ సీఎం మమతా బెనర్జీ అన్నారు. కనీసం 200 సీట్లు గెలిచి చూపించండి అని ఆ పార్టీకి సవాల్ విసిరారు. ఆదివారం బెంగాల్లోని కృష్ణానగర్ సెగ్మెంట్లో జరిగిన ఎన్నికల ప్రచార ర్యాలీలో మమత మాట్లాడారు. పౌరసత్వ సవరణ చట్టాన్ని(సీఏఏ) బెంగాల్లో అనుమతించే ప్రసక్తే లేదని ఆమె మరోసారి స్పష్టం చేశారు.
సీఏఏ కోసం దరఖాస్తు చేసుకున్నోళ్లందరినీ విదేశీయుల కింద లెక్కగడతారని ఆరోపించారు. కాబట్టి, ఎవరూ అప్లికేషన్ చేయొద్దని ప్రజలను కోరారు. ఇక్కడి స్థానికులపై ఫారినర్లుగా ముద్రవేయడాన్ని తాను ఎన్నటికీ అంగీకరించబోనని, ఆల్రెడీ సిటిజన్షిప్ ఉన్నోళ్ల పౌరసత్వాన్ని లాక్కునే సీఏఏను ఒప్పుకోనని చెప్పారు. సీఏఏపై ప్రధాని మోదీ చెప్తున్నవన్నీ అబద్ధాలేనని ఆరోపించారు. చట్టబద్ధంగా మనదేశ సిటిజన్షిప్ ఉన్నోళ్లను విదేశీయులుగా మార్చే కుట్ర సీఏఏ పేరుతో చేస్తున్నారని మండిపడ్డారు. ‘‘సీఏఏ అనేది ఒక ఉచ్చు లాంటిది. కేంద్ర సర్కారు తప్పుడు హామీలు నమ్మి ఆ ఉచ్చులో పడిపోకండి. దరఖాస్తు చేశారంటే ఐదేండ్లు ఫారినర్లుగా మారిపోతారు” అని మమతా బెనర్జీ చెప్పారు.
