మంచిర్యాల, వెలుగు: మంచిర్యాల జిల్లా జైపూర్లోని సింగరేణి థర్మల్ పవర్ ప్లాంట్ (ఎస్టీపీపీ)లో కరెంట్ ఉత్పత్తిలో రికార్డులు సాధిస్తున్న సింగరేణి సంస్థ అందుకు చెమటోడుస్తున్న కార్మికుల సంక్షేమాన్ని గాలికి వదిలేసింది. ఎస్టీపీపీ నిర్వహణను ప్రైవేట్ కంపెనీకి అప్పగించి అందులో పనిచేస్తున్న కాంట్రాక్ట్, ఔట్సోర్సింగ్ ఎంప్లాయీస్ జీవితాలతో చెలగాటమాడుతోంది. ప్లాంట్లో జరుగుతున్న ప్రమాదాల్లో వర్కర్లకు గాయాలైనా, చనిపోయినా లేబర్ యూనియన్ల ఆధ్వర్యంలో మిగతా కార్మికులు రోడ్డెక్కితే తప్ప బాధితులకు కనీస న్యాయం దక్కని పరిస్థితి నెలకొన్నది. సింగరేణి తరపున పర్యవేక్షణ బాధ్యతలను రిటైర్డ్ ఆఫీసర్లకు అప్పగించి పెత్తనమంతా వారికే కట్టబెట్టడంతో అసలు ప్లాంట్లో ఏం జరుగుతుందో కూడా బయటకు తెలిసే అవకాశమే లేకుండా పోయింది.
కాంట్రాక్టర్ల చేతిలో ఎస్టీపీపీ....
ఉమ్మడి రాష్ర్టంలో కాంగ్రెస్ ప్రభుత్వ హయాంలో సింగరేణి సంస్థ జైపూర్లో థర్మల్ ప్లాంట్ నిర్మాణం మొదలైంది. తెలంగాణలో టీఆర్ఎస్ సర్కారు అధికారంలోకి వచ్చిన తర్వాత 2016లో కరెంట్ ఉత్పత్తిని ప్రారంభించింది. ఎస్టీపీపీ నిర్మాణం నుంచి కరెంట్ ఉత్పత్తి వరకు అన్ని పనులను ప్రైవేట్ కంపెనీలకు అప్పగించిన సింగరేణి కేవలం పర్యవేక్షణకే పరిమితమైంది. గతంలో నాలుగేండ్లు జర్మనీ దేశానికి చెందిన స్టీగ్ కంపెనీ ఎస్టీపీపీని నడిపించింది. రెండు సంవత్సరాల కిందట పవర్మెక్ అనే మరో కంపెనీ కాంట్రాక్ట్ దక్కించుకుంది. సింగరేణి సంస్థ ప్లాంట్ నిర్వహణ బాధ్యతల నుంచి తప్పుకొని కాంట్రాక్టర్ల చేతిలో పెట్టడంతో వాళ్లు కార్మికుల జీవితాలతో ఆటలాడుకుంటున్నారు.
సింగరేణి పర్యవేక్షణకే పరిమితం...
ఎస్టీపీపీలో కరెంట్ ఉత్పత్తి మొదలు కార్మికులకు జీతాల చెల్లింపు వరకు కాంట్రాక్ట్ సంస్థలే చూసుకుంటున్నాయి. సింగరేణి యాజమాన్యం కేవలం పర్యవేక్షణకే పరిమితం కావడంతో కార్మికుల భద్రత, సంక్షేమం అటకెక్కింది. 1200 మెగావాట్ల ప్లాంట్లో ప్రతి నెల మేనేజ్మెంట్ నిర్దేశించిన పీఎల్ఎఫ్ (పవర్ లోడ్ ఫ్యాక్టర్) సాధిస్తే చాలు మిగతా విషయాలు అక్కర్లేదనే రీతిలో అధికారులు వ్యవహరిస్తున్నారు. ఎస్టీపీపీలో సుమారు 1600 మంది కాంట్రాక్ట్, ఔట్సోర్సింగ్ ఎంప్లాయీస్ పనిచేస్తున్నారు. ఇందులో భూనిర్వాసితులు, లోకల్ కార్మికులు 400 మంది వరకు ఉండగా, మిగతా 1200 మంది ఉత్తర భారత రాష్ర్టాలకు చెందినవారు. ఉన్నతాధికారులు కూడా అక్కడివాళ్లే కావడంతో లోకల్ ఎంప్లాయీస్ను చిన్నచూపు చూస్తున్నారు. కార్మికులకు వేతనాలు చెల్లింపు, పని స్థలాల్లో భద్రత, సంక్షేమం విషయంలో తీవ్ర అన్యాయం చేస్తున్నారు.
తరచూ ప్రమాదాలు..
సింగరేణి సంస్థ ఎస్టీపీపీలో పనిచేస్తున్న కాంట్రాక్ట్, ఔట్సోర్సింగ్ కార్మికుల సంక్షేమాన్ని పూర్తిగా గాలికి వదిలేసింది. ప్రిన్సిపల్ ఎంప్లాయర్గా కార్మికుల బాగోగులు చూడాలన్న బాధ్యతను మర్చిపోయింది. దీంతో కార్మికులు కాంట్రాక్ట్ కంపెనీల దయాదాక్షిణ్యాలపై ఆధారపడాల్సిన పరిస్థితి నెలకొన్నది. పని స్థలాల్లో కనీస రక్షణ చర్యలు పాటించకపోవడంతో తరచూ ప్రమాదాలు జరుగుతున్నాయి. గాయాలైనా, చనిపోయినా తోటి కార్మికులు రోడ్డెక్కితే తప్ప నష్టపరిహారం ఇవ్వడం లేదు. మూడ్రోజుల కిందట జరిగిన ప్రమాదంలో చంద్రమోహన్ అనే మెకానిక్ మృతి చెందడం తెలిసిందే. కార్మిక సంఘాలు, కార్మికులు పెద్ద ఎత్తున ఆందోళన చేయడంతో బాధిత కుటుంబానికి రూ.50 లక్షల ఎక్స్గ్రేషియా, రెండు ఉద్యోగాలు ఇచ్చేందుకు పవర్మెక్ యాజమాన్యం ఒప్పుకుంది. గతంలో కూడా ఇటువంటి సంఘటనలు జరిగినప్పటికీ అవి బయటకు రాకుండా అధికారులు తొక్కిపెట్టారనే ఆరోపణలు వినిపిస్తున్నాయి.
